İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 311 Hüküm no: 346 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yasef v. Mosi’nin bakkal dükkânını, kanun gereği başka bir mahalle izinsiz nakl etmemesi gerektiği Yahûdi bakkāl gediği nakli men‘ Ma‘rûz Âsitâne-i aliyyede vâki‘ bakkāl tâifesinin pazarbaşı vekîli Ahmed Ağa ve yiğitbaşı es-Seyyid Ahmed ve ustalarından Yazıcı Nikola ve kabz-ı mal Luka ve ustabaşı Zahraki ve Nikola ve Yorgaki ve Anderiko ve Dimitri vesâir mazbûtü’l-esâmî ustalar meclis-i şer‘-i enverde Bakkāl Yasef v. Mosi nâm Yahûd muvâcehesinde işbu yedimizde olan bir kıt‘a fermân-ı âlîşân nâtık olduğu üzere Âsitâne-i aliyyede ve bilâd-ı selâsede vâki‘ bakkāl gediği âlât-ı lâzıme-i ma‘lûmesine mâlik olanlar gedik âlâtını âhar mahalle nakl eylemesini murâd eylediğinde bâ-i‘lâm ve pazarbaşı ve ustalarımız re’yiyle naklolunmak şürût ve nizâmımızdan olup bilâ-i‘lâm naklolunmak memnû‘ iken merkūm Yasef Yahûdi hilâf-ı şürût bilâ-i‘lâm İstanbul’da Balatkapısı dâhilinde Köprübaşı nâm mahalde kâin Çiçekçi David dükkânı demekle arîf bir bâb bakkāl dükkânı derûnunda mâlik olduğu gedik âlât-ı lâzıme-i ma‘lûmesini dört yolağzı nâm mahalde kâin bir bâb bakkāl dükkânına nakl ve küşâd etmekle men‘ olunmak murâdımızdır deyü takrîrlerine mutâbık bir kıt‘a fermân-ı âlîşân ibrâz ettiklerinde mersûm Yasef Yahûdi mazmûn-ı fermân-ı âlîşânı tasdîk lâkin âlât-ı mezkûreyi dükkân-ı evvel merkūma işbu târih-i i‘lâmdan üç gün mürûrunda nakle ve fîmâ ba‘d hilâf-ı fermân-ı âlî hareket etmemek üzere ta‘ahhüd eylediği İstanbul Mahkemesi’nden huzûr-ı âlîlerine i‘lâm olundu. Fî-23 S sene [1]217