İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 311 Hüküm no: 347 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbâz Agob v. Bedros’un, malik olduğu değirmen ve fırının yarım hissesini Tokel v. Nikagos’a sattığı 20.000 guruşa değirmen ve fırın nısfını mübâya‘a Ma‘rûz İstanbul’da Okçularbaşında kâin çatal fırın tâ‘bir olunur bir bâb ekmekçi fırını ve fırın-ı mezbûra merbût kapan-ı dakīk kurbünde arabacılar içi nâm mahalde kâin on iki horoslu bir bâb değirmen derûnlarında mevcûde kırk sekiz re’s bârgir vesâir âlât-ı lâzıme-i ma‘lûmelerin nısfı olan yirmi dört re’s bârgir hisse-i şâyi‘asına mâlik olan habbâz Agob v. Bedros nâm zimmî meclis-i şer‘-i enverde âlât-ı lâzıme-i ma‘lûmelerin nısf-ı âharına mâlik olan bâ‘isü’l-i‘lâm Usta Tokel v. Nikagos mahzarında takrîr-i kelâm edip ben ber-vech-i muharrer mâlik olduğum yirmi dört re’s bârgir ve sâir âlât-ı lâzıme-i ma‘lûmemi tarefeynden îcâb ve kabûlü hâvi bey‘-i kat‘î ve safka-i vâhide ile müşterikim mersûm Tokel zimmîye işbu yedimizde olup bâlâsı hatt-ı hümâyûn-ı azamet-makrûn ile mu‘anven bir kıt‘a fermân-ı âlîşânda münderic olan şürûta ri‘âyet olunmak üzere yirmi bin guruşa bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden semeni olan meblağ-ı mezbûr yirmi bin guruşun on bir bin beş yüz guruşunu cânib-i mîrîye deynim olan ol mikdâr guruşa mahsûben târih-i i‘lâmdan beher sene biner guruşdan on bir buçuk senede meblağ-ı mezbûr on bir bin beş yüz guruşu cânib-i mîrîye ve bâkīsi olan sekiz bin beş yüz guruşu dahi ma‘lûmü’l-esâmî tüccâra olan deynim için kethüdâmız işbu hâzır bi’l-meclis el-Hâc Abdi Ağa ma‘rifetiyle beher sene ikişer yüz elli guruşdan otuz dört ayda meblağ-ı mezbûr sekiz bin beş yüz guruşu dâyînlerim tüccâr-ı merkūmuna tamamen edâ etmek üzere mersûm Tokel zimmîye emr eylediğimde ol dahi ber-vech-i muharrer edâya ta‘ahhüd etmekle mebi‘-i mezkûrun tağrîr ve gabnine müte‘allika âmme-i da‘vâdan tarefeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik fîmâ ba‘d nısf-ı âlât-ı mezkûrede benim aslan ve kat‘an alâka ve medhalim kalmayıp mecmû‘u mersûm Tokel zimmînin mülk-i müşterâsı olmuşdur dedikde mukırr-ı mersûmun sâdır olan takrîrini mersûm Tokel zimmî ba‘de’t-tasdîk zikr olunan âlât-ı muharrere-i mezkûreler mersûm Agob zimmînin üzerinden ref‘ ve mersûm Tokel zimmînin mülk-i müşterâsı olmak üzere baş muhâsebe ve navl kalemlerine kayd ve yedine sûret i‘tâ buyrulması için fermân-ı âlî sudûru niyâzında oldukları İstanbul Mahkemesi’nden huzûr-ı âlîlerine i‘lâm olundu. Fî-15 S sene [1]217