İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 312 Hüküm no: 348 Orijinal metin no: [49a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise bt. Çukadâr Ali’nin, kocası Kılavuz Çavuşzâde Mustafa Ağa’ya itâat etmesi gerektiği İtâ‘ate tenbîh Ma‘rûz Sâhib-i arzuhâl Kılavuz Çavuşzâde Mustafa Ağa meclis-i şer‘-i şerîf-i enverde derûn-ı arzuhâlde mezkûretü’l-ism mu‘arrefetü’z-zât hâlâ zevcesi Nefise bt. Çukadâr Ali nâm Hatun muvâcehesinde mezbûre Nefise Hatun mehr-i müeccel tesmiyesi ve mehr-i mu‘accel-i müstevfâsıyla zevce-i medhûlün-bihâm iken bana itâ‘at ve hukūk-ı zevciyete mürâ‘at etmemekle suâl olunup İstanbul’da Hocapaşa kurbünde tehiyye eylediğim menzile gelip bana itâ‘at etmek üzere zevcem mezbûreye tenbîh olunmak murâdımdır deyü da‘vâ ettikde ol dahi cevâbında müdde‘î-i mezbûr Mustafa Ağa’nın ber-vech-i muharrer zevce-i medhûlün-bihâsı olduğunu ve mehr-i mu‘accelini istîfâ eylediğini ikrâr u i‘tirâf etmekle mûcebiyle müdde‘î-i mezbûr Mustafa Ağa zevcesi mezbûre Nefise’yi infâk ve iksâya mezbûr Mustafa Ağa’ya ve mezbûre Nefise Hatun dahi zevc-i mezbûra itâ‘at ve hukūk-ı zevciyete mürâ‘at etmek üzere mezbûre Nefise Hatun’a tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-21 S sene [1]217