İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 313 Hüküm no: 349 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lasone bt. Yani’nin, Hallâc Lefter v. Nikola aleyhine açtığı hallâc dükkânı gediği davasında iddiasını ispat edemediğinden muarazadan men edildiği Hallâc gediği nizâ‘ı mu‘ârazadan men‘ Ma‘rûz Sâhibe-i arzuhâl mu‘arrefetü’ş-şahs Lasone bt. Yani nâm Nasrâniye meclis-i şer‘-i enverde Hallâc Lefter v. Nikola zimmî muvâcehesinde İstanbul’da Dîvânyolu nâm mahalde kâin bir bâb hallâc dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin nısfı zevcim Kostandi zimmînin <> ve nısf-ı âharı karındaşı Yani zimmînin yedlerinde mülkü iken müte‘âkiben hâlik ve âlât-ı mezkûre hasran benimle zevcim mezbûrun kızı Sofya Nasrâniyeye mevrûs olmuşken âlât-ı muharrere-i mezkûreyi mersûm Lefter zimmî müstakillen fuzûlî zabt etmekle suâl olunup hisse-i irsiyyemden keff-i yedine tenbîh olunmak murâdımdır deyü eylediği da‘vâsını mersûm Lefter inkâr edip ve ikāmet-i beyyine edemediğinden gayri mersûme Lesona Nasrâniye şerîre ve müzevvire ve dâima bu makūle da‘vâları kendiye kâr ittihâz eylediğini esnâf-ı mezkûre muvâcehesinde haber vermeleriyle li-ecli’t-tedîb vatanı olan Trabzon kazâsına nefy ve iclâsı bâbında bir kıt‘a i‘lâm olunmuşdu deyü mersûm Lefter’in takrîrine mutâbık ibrâz eylediği i‘lâmın mazmûnunu mersûm Lesona Nasrâniye mu‘terife olduğundan mâ‘adâ esnâf-ı mezkûrenin kethüdâsı Mehmed Ağa b. Mehmed ve ustalarından el-Hâc Süleyman b. Mehmed ve Ali b. Hüseyin ve Halil b. el-Hâc Mehmed nâm kimesnelerden her biri dahi muvâcehesinde haber vermeleriyle mûcebiyle mersûme Lesona Nasrâniyenin da‘vâ-yı mezkûresi tezvîr ve mahz-ı celb-i mâl sevdâsıyla olduğu âşikâr olmağla mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-15 S sene [1]217