İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 314 Hüküm no: 350 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar Salamon v. İsak’ın, attar esnafı nizamına aykırı davranmayacağını taahhüt ettiği Attârân esnâfına dâir Yahûdilerin ta‘ahhüd i‘lâmı Ma‘rûz Mısırçarşısı attârları Kethüdâsı Ömer Ağa ve esnâfdan İsmail Ağa ve Hasan Efendi ve el-Hâc Hüseyin ve el-Hâc Hasan ve el-Hâc Mehmed Emin ve el-Hâc Abdi vesâirleri meclis-i şer‘-i enverde Galata’da Karaki kapısında Attâr Salamon v. İsak muvâcehesinde işbu yedimizde olup bir kıt‘a fermân-ı âlîşân nâtık olduğu üzere şürût-ı nizâmımız olup Mısırçarşısı metâ‘ı Âsitâne-i aliyyeye geldikde kethüdâ ve ustalarımız ma‘rifetleriyle kat‘-ı fiyat olunmadıkça esnâf ve kenar attârları iştirâ etmek memnû‘ ve düstûrü’l-amel iken metâ‘ımızdan olan neft yağı bu esnâda Âsitâne-i aliyyeye vürûd ettikde kable kat‘i’l-fiyat mersûm Salamon Yahûdi hilâf-ı emr-i âlî iştirâ edip bu vechile şürût-ı nizâmımıza halel ve ızmihlâline bâ‘is olmağla tedîb olunması murâdımızdır deyü iştikâ ve takrîrlerine mutâbık bir kıt‘a fermân-ı âlîşân ibraz ettiklerinde mersûm Salamon Yahûdi mazmûn-ı fermân-ı âlîşânı tasdîk ve ber-vech-i muharrer <> iştirâ eylediğini inkârından mâ‘adâ fîmâ ba‘d dahi mazmûn-ı fermân-ı âlîşân üzere kable kat‘i’l-fiyat esnâf-ı mezbûreye mahsûs olan metâ‘ı iştirâ etmeyip ve hilâfına hareket eder ise vaz‘-ı kürek olmalarına mersûm Salamon ve mahâll-i mezkûrda attâr olan İsak ve diğer Salamon ve Menahim ve Haym Yahûdiler her biri ta‘ahhüd eylediklerinde esnâf-ı mezbûre dahi râzılar olup bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-23 S sene [1]217