İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 314 Hüküm no: 351 Orijinal metin no: [49b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ârif b. Ali’nin, Yorgancı Mehmed Memiş aleyhine açtığı yorgancı dükkânı gediği davasında iddiasını ispat edemediğinden muarazadan men edildiği Yorgancı gediği nizâ‘ı mu‘ârazadan men‘ Ma‘rûz Sâhib-i arzuhâl es-Seyyid Ahmed Ârif b. es-Seyyid Ali meclis-i şer‘-i şerîf-i enverde zikri âtî gedik âlâtına vaz‘-ı yedi mütehakkık olan Yorgânî es-Seyyid Mehmed Memiş b. Hasan muvâcehesinde İstanbul’da yorgancılar içinde vâki‘ iki kovalı kuyu civârında ma‘lûmü’l-hudûd bir bâb yorgancı dükkânı derûnunda mevcûde beyne’l-esnâf gedik tâ‘bir olunur yedimde mülküm olan âlât-ı lâzıme-i mahsûsayı bin iki yüz sekiz senesi hilâlinde işbu hâzır bi’l-meclis derûn-ı arzuhâlde mezkûrü’l-ism Yorgânî el-Hâc Halil Ağa’ya bey‘ murâd eylediğimde semeni her ne zamân kendiye red edersem âlât-ı muharrere-i mezkûreyi bana vermek şartıyla bi-tarîkı’l-istiğlâl mezbûr el-Hâc Halil Ağa’ya altı yüz guruşa bey‘ ve teslîm ol dahi ber-vech-i muharrer iştirâ ve kabz ve kabûl eyledikden sonra âlât-ı mezkûreyi merkūm es-Seyyid Mehmed’e semen-i ma‘lûm ve makbûza fuzûlî bey‘ ve teslîm edip lâkin ben ber-vech-i muharrer merkūm es-Seyyid Mehmed’e bey‘ini mücîz olmamamla merkūm altı yüz guruşu hâzır-ı merkūm el-Hâc Halil Ağa’ya edâ ile âlât-ı mezkûreden merkūm es-Seyyid Mehmed Memiş keff-i yed ve bana teslîme tenbîh olunmak murâdımdır deyü da‘vâ ettikde merkūm es-Seyyid Mehmed Memiş cevâbında âlât-ı muharrere-i mezkûreyi târih-i mezbûrda müdde‘î-i merkūm es-Seyyid Ahmed Ârif semen-i merkūm altı yüz guruşa hâzır-ı merkūm el-Hâc Halil Ağa’ya kat‘iyyen bey‘ ve teslîm ol dahi ba‘de’l-iştirâ merkūm es-Seyyid Ahmed Ârif âlât-ı mezkûreyi merkūm el-Hâc Halil Ağa’ya bey‘-i kat‘î ile bey‘ini ve âlât-ı mezkûrede alâkası kalmadığını ikrâr u i‘tirâf ve âlât-ı mezkûreye müte‘allika âmme-i da‘vâdan dahi merkūm el-Hâc Halil Ağa’nın zimmetini kabûlünü hâvi ibrâ ve iskāt etmişdi deyü hâzır-ı merkūm el-Hâc Halil Ağa’nın tasdîkiyle müdde‘î-i mezbûr es-Seyyid Ahmed Ârif’in inkârına mukārin eylediği da‘vâdan lede’t-tezkiye adl ve makbuli’ş-şehâde idükleri ihbâr olunan es-Seyyid el-Hâc Ahmed Ağa b. Ali ve el-Hâc Halil Ağa b. Mehmed şehâdetleriyle bi’l-muvâcehe vech-i şer‘î üzere isbât etmeğin mûcebince mezbûr es-Seyyid Ahmed Ârif da‘vâ-yı mezkûresiyle merkūm es-Seyid Mehmed Memiş’e bî-vech mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-25 S sene [1]217