İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 315 Hüküm no: 352 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Bedros v. Marat ile Arpacı Veliyüddin b. Ahmed’in birbirlerinin zimmetlerini ibra ettikleri Sarraf ile arpacı birbirleriyle meccânen ibrâ Ma‘rûz Arzuhâl eden Sarraf Bedros v. Marat nâm zimmî meclis-i şer‘-i kavîmde Arpacı Veliyüddin b. Ahmed nâm kimesne muvâcehesinde mezbûr Veliyüddin zimmetinde yedimde olup bin iki yüz on dört senesi Saferinin on beşinci günü târihiyle muvarrah işbu bir kıt‘a deyn temessükü <> mantûkunca cihet-i karzdan beş yüz guruş ve diğer bir kıt‘a temessük mantûkunca üç yüz on dokuz guruş ki cem‘an sekiz yüz on dokuz hakkım olmağla hâlâ taleb ederim deyü da‘vâ eylediğimde mezbûr Veliyüddin cevâbında âhar temessük ile cihet-i karzdan beş yüz yirmi guruş ve işbu bir kıt‘a temessük ile üç yüz on dokuz guruş ki cem‘an sekiz yüz otuz dokuz zimmetinde bana deyni olduğunu ikrâr lâkin bin iki yüz on üç senesinden on beş senesi Ramazanına değin iki senede sana ceste ceste malımdan bey‘ ve teslîm eylediğim ma‘lûmü’l-keyl şa‘îr semeninden iki bin yüz elli guruş ve şaîr hammâliyesinden kırk iki buçuk guruş ve îcâr eylediğim mahzen kirâsından beher şehr onar guruşdan on bir ayda zimmetinde terâküm eden yüz on guruş ki cem‘an iki bin üç yüz iki buçuk guruş zimmetinde hakkım olmağla deyn-i mezkûrum olan sekiz yüz otuz dokuz guruşu ber-vech-i muharrer hakkım olan meblağ-ı mecmû‘-ı mezkûr ol mikdârına takās ve mahsûb olunup mâ‘adâsı olan bin dört yüz altmış üç buçuk guruşu taleb ederim deyü benden da‘vâ ben dahi inkâr edip ol vechile beynimizde ba‘de vukū‘ı’l-münâza‘a bâ-tavassut-ı müslihîn tarefeynden her birimiz ber-vech-i muharrer âhardan tasaddî eylediğimiz da‘vâ-yı mezkûrelerimizden meccânen fâriğler olup bâlâda zikr olunan husûslara ve beynimizde cereyân eden ahz u i‘tâya ve işbu târih-i i‘lâma gelince sâir cemî‘-i hukūk-ı şer‘iyyeye müte‘allika âmme-i da‘vâdan tarefeynden her birimiz âharın zimmetini ibrâ-i âm ile ibrâ ve iskāt ve her birimiz ber-vech-i muharerr âharın ibrâsını kabûl ile külliyen kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı âlîlerine i‘lâm olundu. Fî-23 S sene [1]217