İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 316 Hüküm no: 353 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Memiş b. Mehmed ve İsa b. Mustafa’nın esnafa itâat etmediğinden Manav esnaflığından çıkarıldığı Manav esnâfından ihrâc nefer 2 Ma‘rûz Âsitâne-i aliyyede vâki‘ manav esnâfının pazarbaşı vekîli Hâfız İsmail Efendi ve ihtiyârlarından es-Seyyid el-Hâc Yusuf ve es-Seyyid Ömer ve Musa ve el-Hâc Mehmed ve Mustafa Yazıcı ve Osman ve Mehmed ve es-Seyyid İbrahim ve es-Seyyid Hasan ve Yunus Yazıcı vesâir mazbûtü’l-esâmî kimesnelerden her biri meclis-i şer‘-i şerîf-i enverde mezbûrûn es-Seyyid Mehmed Memiş b. Mehmed ve es-Seyyid İsa b. Mustafa muvâcehelerinde mezbûrân es-Seyyid Mehmed Memiş ve es-Seyyid İsa esnâfımızdan olup lâkin kendi hallerinde olmayıp mezbûr es-Seyyid Mehmed Memiş dâimâ esnâfımız beyninde tahrîk ve mezbûr es-Seyyid İsa esnâfımıza itâ‘at etmeyip dâimâ itâle hatta târih-i i‘lâm gecesi nısfü’l-leylde hizmetinde olduğu kimesnenin üzerine hücûm ve boğazını sıkıp ve mezbûr es-Seyyid Mehmed Memiş dahi mu‘âvenet edip bu vechile kendilerden emn ve rahatımız meslûbdur deyü mezbûrânın muvâcehelerinde sû-i hâllerini ihbâr ve esnâf-ı mezbûreden hurûcunu istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî-25 S sene [1]217