İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 317 Hüküm no: 354 Orijinal metin no: [50a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Efada v. Yasef’in alacaklı olduğu Avanes v. Serkiz ile sulh olduğu 150 guruşa sulh ve ibrâ Ma‘rûz Kazzâz Efada v. Yasef nâm Yahûdi meclis-i şer‘-i enverde bâ‘isü’l-i‘lâm Avanes v. Serkiz nâm zimmî muvâcehesinde mersûm Avanes zimmî zimmetinde târih-i i‘lâmdan üç ay mukaddem yedimden ve malımdan iştirâ ve kabz eylediği beher kıyyesi ellişer guruşdan on bir buçuk vakıyye gaytân semeninden beş yüz yetmiş beş guruş alacağım olup hatta târih-i i‘lâmdan üç gün mukaddem ikrâr dahi etmekle meblağ-ı mezbûru mersûm Avanes zimmîden hâlâ taleb ederim deyü tasaddî eylediğim da‘vâmdan bâ-tavassut-ı muslihîn mersûm Avanes zimmî ile an inkâr kat‘an li’n-nizâ‘ yüz elli guruş bedel-i makbûza ba‘de’s-sulh ve’l-kabûl ziyâde müdde‘âma işbu târih-i i‘lâma sâir cemî‘-i hukūk-ı şer‘iyyeye müte‘allika âmme-i da‘vâdan mersûm Avanes zimmînin zimmetini kabûlünü hâvi ibrâ ve iskāt eyledim deyü ikrâr ve tasdîkleri tescîl ve İstanbul Mahkemesi’nden huzûr-ı âlîlerine i‘lâm olundu. Fî-27 S sene [1]217