İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 317 Hüküm no: 355 Orijinal metin no: [50a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cariye olarak satılmak istenen Emine nâm-ı diğer Hesnâ’nın hür olduğunu ispat etmesi İsbât-ı hürriyet Ma‘rûz Cüssesinin on üç yaşında olmağa tahammülü olmağla sâbıkā rıkka inkıyâdını mukırre ve mu‘terife ve ber-vech-i âtî da‘vâya kıbel-i şer‘den me’zûne olan açık kara kaşlı kara gözlü siyah saçlı sâhibe-i arzuhâl Emine nâm-ı diğer Hesnâ nâm mürâhika çarşamba günü arz odasında huzûr-ı hazret-i kāimmakām-ı âli-makāmda ma‘kūd meclis-i şer‘-i enverde kendiye Gürcü cinsinden câriyesi olmak üzere vaz‘-ı yedi mütehakkık olan Galata’ya muzâfe kasaba-i Tophane’de sâkin mîr-i mirân Ali Paşa’nın tarafından husûs-ı âti’l-beyânda vekîl olduğu Mustafa b. Nasuh ve diğer Mustafa b. İbrahim şehâdetleriyle sâbit olan Hâfız Mehmed Efendi b. Mehmed muvâcehesinde İslâmbol’da Avratpazarında mukaddemâ sâkin olup bir seneden beri Lanka nâm mahalde sâkin Parmakkapı kurbünde Eskici Ahmed b. Ahmed ve mezbûr Ahmed’in oğlu süvâri topçusu Mustafa hâzır olduğu hâlde ben işbu hâzır bi’l-meclis hürrü’l-asl Ahmed’in firâşından hâsıla ve zevcesi kezâlik hürretü’l-asl Şerîfe Hatice’den mütevellîde olmamla bana ve ebeveynim mezbûrana kat‘an rık târi olmamış hürretü’l-asl olup sâlifü’z-zikr Avratpazarında kâin ebeveynim mezbûrânın menzilinde iken vâlidem mezbûre Şerîfe Hatice Hatun târih-i i‘lâmdan iki sene mukaddem fevt oldukda babam mezbûr Ahmed beni [50b] Gürcü cinsinden câriye olmak üzere Ayvansaray nâm mahalde sâkine Fâtıma Hanım’a bey‘ ve teslîm ol dahi beni ba‘de’l-iştirâ Yenihamam kurbünde İvaz Paşa kerîmesi ismi ma‘lûmum olmayan hanıma bey‘ ve teslîm ol dahi ba‘de’l-iştirâ ve’l-kabz müvekkil-i mûmâ-ileyh Ali Paşa’ya bey‘ ve teslîm ol dahi beni iştirâ ve kabz edip ol vechile rakīka câriyesi olmak üzere bana bi-gayr-ı hakkın vaz‘-ı yed eder suâl olunup müvekkil-i mûmâ-ileyhin kasr-ı yedine tenbîh-birle sebîlim tahliyye olunmak murâdımdır deyü da‘vâ ettikde vekîl-i mezbûr dahi cevâbında müvekkil-i mûmâ-ileyh Ali Paşa mevsûfe-i mezbûreyi merkūme İvaz Paşa kerîmesi hanımdan Gürcü cinsinden rakīka câriye olmak üzere iki bin üç yüz guruş semen-i medfû‘ ve makbûza iştirâ ve kabz etmekle ol vechile câriye-i memlûkesi olmak üzere vaz‘-ı yed eder deyü ber-vech-i muharrer vaz‘-ı yedini bi’l-vekâle ikrâr ve hürriyet-i asliye müdde‘âsını ba‘de’l-inkâr mevsûfe-i mezbûre Emine nâm-ı diğer Hasnâ ber-vech-i muharrer hürriyet-i asliyye müdde‘âsını sâlifü’l-beyân Avratpazarı Mahallesi ahâlîsinden ve sikāt-ı sahîhatü’l-kelimâtdan Eskici Ahmed b. Mustafa ve Kahveci Osman b. Ahmed ve Sarrac Mahmud b. İbrahim nâm kimesneler ile mahalle-i mezbûrede vaki‘ Cerrahpaşa hamamı Nâzırı Hatice bt. Mahmud dellâkelerinden Rukiye bt. Osman ve diğer Rukiye bt. Mehmed nâm Hatunların arz odasında bi’l-muvâcehe vech-i vecih-i şer‘î üzere şehâdetleriyle isbât etmeğin mûcebiyle mevsûfe-i mezbûre Emine nâm-ı diğer Hesnâ’nın hürriyetine hüküm ve müvekkil-i mûmâ-ileyhe izâfetle vekîl-i mezbûrun kasr-ı yedine tenbîh olunup sebîli tahliyye olunduğu İstanbul Mahkemesi’nden huzûr-ı âlîlerine i‘lâm olundu. Fî-selh-i Safer sene 1217