İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 318 Hüküm no: 356 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cariye olarak satılmak istenen Tiflisli Edayi ve kızı Ziba’nın hür olduklarını ispat etmeleri İsbât-ı hürriyet Ma‘rûz Sâbıkā rıkka inkıyâdını mukırra ve mu‘terife ve ber-vech-i âtî da‘vâya kıbel-i şer‘den me’zûne olan kısa boylu çatık kaşlı sâhibe-i arzuhâl Edayi nâm Hatun meclis-i şer‘-i enverde Gürcü cinsinden câriyesi olmak üzere kendiye vaz‘-ı yedi mütehakkık olan derûn-ı arzuhâlde mezkûrü’l-ism Esirci Mehmed b. Mustafa muvâcehesinde ben nefs-i Tiflis kalesi derûnunda mütemekkin olan fi’l-asl Karabağî mütemekkinlerinden hürrü’l-asl olan Allahverdi nâm Ermeninin firâşından hâsıl ve zevcesi kezâlik hürretü’l-asl olan Senatin nâm Ermeniyeden mütevellide olup bana ve ebeveynime kat‘an rık târi olmamış hürretü’l-asl olduğumdan mâ‘adâ Tiflis Erâmîni’nin ricâl ve nisâ ve sıbyânının sebiy ve istirkākı bâ-fermân-ı âlî memnû‘ iken ben ve benden mütevellîde bana teba‘iyetle kezâlik hürretü’l-asl olan işbu hâzıra bi’l-meclis on üç yaşında mâî gözlü sarı kaşlı sadriye murâhika kızım Zibâ zikr olunan Tiflis kalesinden bir-takrîb ile sebiy ve sirka olunup ba‘dehû şeref-i İslâm’la ben müşerrefe ve bana teba‘iyetle kızım hâzıra-i mezbûre dahi kezâlik Müslime oldukdan sonra tedâvül-i eyâdî ile biz el-yevm mezbûr Esirci Mehmed’in yedinde olup bize rakīka câriyeleri olmak üzere vaz‘-ı yed eder suâl olunup men‘ ve sebilimiz tahliyye olunmak murâdımızdır deyü da‘vâ ettiklerinde ol dahi cevâbında sâlifü’z-zikr Tiflis erâminin ricâl ve nisâ ve sıbyânın sebiy ve istirkākları memnû‘ olduğunu ikrâr lâkin mevsûfetân-ı mezbûrânı Gürcü cinsinden rakīka olmak üzere gāib ani’l-meclis el-Hâc Ahmed Ağa’dan bin altı yüz guruş semen-i medfû‘ ve makbûza iştirâ etmişdim deyü ber-vech-i muharrer müdde‘âlarını inkâr etmekle müdde‘iye-i mezbûre ber-vech-i muharrer müdde‘âsını lede’t-tezkiye adl ve makbûlü’ş-şehâde idükleri ihbâr olunan medîne-i Üsküdar’da Çömlekçi olup fi’l-asl Tiflis ahâlîsinden İsmail b. el-Hâc Haydar ve Hakverdi b. Musgalı nâm Müslimler şehâdetleriyle bi’l-muvâcehe ber-nehc-i şer‘î isbât etmeğin mûcebiyle mezbûre Edayi ve kızı hâzıra bi’l-meclis mezbûre Ziba’nın sebilleri tahliyye olunup ve merkūm Esirci Mehmed’in kasr-ı yedine tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-selh-i Safer sene 1217