İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 319 Hüküm no: 357 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih b. Mustafa ile Seyyid Ahmed b. Mehmed’in birbirlerinin zimmetlerini ibra ettikleri Yumurtacı ibrâsı Ma‘rûz Sâhib-i arzuhâl Salih b. Mustafa meclis-i şer‘-i münîrde odunkapısı tüccârından derûn-ı arzuhâlde mezkûrü’l-ism es-Seyyid Ahmed b. Mehmed muvâcehesinde mezbûr es-Seyyid Ahmed manav metâ‘ı bey‘ u şirâsında fâide beynimizde beraber olmak üzere inânen şerîkleri olup ben iki sene müddetden beri medîne-i İznikmid kazâsından merkūm es-Seyyid Ahmed’e irsâl eylediğim elma ve emrud ve ceviz ve pestil ve yumurta vesâir envâ‘-ı zehâyiri merkūm es-Seyyid Ahmed Âsitâne-i aliyyede bey‘ ve kabz-ı semen edip ol vechile işbu târihe gelince ticâret edip el-hâletü hâzihi fesh-i akd-i şirket ve hesabımız işbu hâzır bi’l-meclis pazarbaşı vekîli vesâirler ma‘rifetiyle rü’yet olundukda merkūmun beyân eylediği fâideden yedinde bir nesne zuhûr etmeyip lâkin müddet-i mezbûrede olan ticâretimizden ziyâde iki bin guruş fâide hâsıl olup merkūm es-Seyyid Ahmed ketm etmekle nısfı olan bin guruş hissemi merkūmdan hâlâ taleb ederim deyü bundan akdem da‘vâ eylediğimde ol dahi inkâr edip ol vechile beynimizde ba‘de vukū‘ı’l-münâza‘a bâ-tavassut-ı muslihîn ben ber-vech-i muharrer tasaddî eylediğim da‘vâ-yı merkūmeden meccânen fâriğ olmamla husûs-ı şirkete ve müddet-i mezbûrede beynimizde cereyân eden ahz u i‘tâya ve mu‘âmelât-ı şettâya müte‘allika âmme-i da‘vâdan tarefeynden her birimiz âharın zimmetini ibrâ-yı âmm-ı râfi‘u’l-hısâm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl ile kat‘an kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı âlîlerine i‘lâm olundu. Fî-25 S sene 1217