İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 323 Hüküm no: 363 Orijinal metin no: [51b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âmine Hatun bt. Osman’ın, Hristo v. Panayot aleyhine açtığı alacak davasında iddiasını ispat edemediğinden muarazadan men edildiği 450 guruş mu‘ârazadan men‘ Ma‘rûz Mübârek kamer-tâb-ı hüsrevâneye arzuhâl takdîm eden mu‘arrefetü’z-zât Âmine Hatun bt. Osman Çarşamba günü arz odasında huzûr-ı hazret-i kāimmakām-ı âli-makāmda ma‘kūd meclis-i şer‘-i enverde bahçıvân tâifesinden Hristo v. Panayot nâm zimmî muvâcehesinde mersûm Hristo zimmî zevcim olup bundan akdem gaybet-i münkatı‘a ile gāib olan Ağacıkzâde Mehmed Emin Ağa’nın tasarrufunda olan Lanka kurbünde vâki‘ bir bâb vakıf bostanda müşâhereten müstecir iken bundan akdem ma‘rifet-i şer‘le ihrâc olundukda malımdan mersûm Hristo zimmî bi-gayr-ı hakkın dört yüz elli guruşumu ahz etmekle istirdâd ederim deyü da‘vâ ettikde ol dahi cevâbında bostân-ı mezkûra izn-i mütevellî ile mülkiyet üzere gars edip malım olan eşcâr-ı ma‘lûmemi gāib ani’l-meclis İspir zimmîye dört yüz elli guruşa bey‘ ve teslîm ve semen-i meblağ-ı mezkûr dört yüz elli guruşu gāib-i mesfûr İspir zimmîden ahz etmişdim deyü müdde‘î-i mezbûrenin ber-vech-i muharrer müdde‘âsını inkâr etmekle müdde‘iye-i mezbûre Âmine Hatun ber-minvâl-i muharrer müdde‘âsına ikāmet-i beyyine edememekle bi’t-taleb mersûm Hristo zimmî arz odasında bi’l-muvâcehe ber-nehc-i şer‘î tahlîf olunmağın mûcebiyle müdde‘iye-i mezbûre Âmine Hatun da‘vâ-yı mezkûresiyle mersûm Hristo zimmîye bilâ-beyyine mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-selh-i S sene [1]217