İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 324 Hüküm no: 364 Orijinal metin no: [51b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koço v. Nano’nun, Sultan Abdülhamid Han vakfından icareli kasap dükkânı gediğini Niko v. Papa Dimitri’ye devrettiği Kassab gediği mübâya‘ası Ma‘rûz Hüdâvendigâr-ı sâbık cennet-mekân firdevs-âşiyân merhûm Abdülhamid Hân hazretlerinin evkāfı musakkafâtından Yedikule hâricinde kâin üçüncü selhhâneye merbût İstanbul’da Arslanhane kurbünde köşebaşında sebzeciye muttasıl bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmelere bâ-temessük-ı vakf mutasarrıf olan Koço v. Nano zimmî meclis-i şer‘-i enverde hâssa kasabbaşısı İzzetlü Mustafa Ağa tarafından vekîli kasablar kethüdâsı es-Seyyid Halil Ağa ve ustalarından mazbûtü’l-esâmî kimesneler hâzır oldukları hâlde kasab ustalığını idâreye kādir idüğü ihbâr olunan bâ‘isü’l-i‘lâm Niko v. Papa Dimitri zimmî muvâcehesinde takrîr-i kelâm edip ber-vech-i muharrer mutasarrıf olduğum âlât-ı lâzıme-i ma‘lûmelerimi hüsn-i rızâ ve tayyib-i ihtiyârım ile bedel-i ma‘lûm ve makbûz mukābelesinde mersûm Niko zimmîye ferağ ve tefvîz eylediğimde ol dahi ber-vech-i muharrer tefevvüz ve kabûl edip ba‘de’l-yevm zikr olunan âlât-ı lâzıme-i ma‘lûmelerde benim kat‘an alâka ve medhalim kalmayıp mersûm Niko zimmînin dâhil-i havza-i tasarrufu olmuşdur dedikde mersûm Niko zimmî dahi ba‘de’t-tasdîk zikr olunan âlât-ı lâzıme-i ma‘lûmeler kendi üzerine defter-i vakfa kaydolunup yedine temessük i‘tâsını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-gurre-i Rebî‘ülevvel sene [1]217