İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 324 Hüküm no: 365 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevlid Kandili münasebetiyle cami ve mescit minarelerinde kandil yakılması Bâ-sahh İstanbul Kādısı faziletlü efendi ( ) işbu i‘lâmınız rikāb-ı hümâyûna arz olundukda Hak te‘âlâ mübârek eyleye âmin mazmûnunda hatt-ı hümâyûn-ı şevket-makrûn şeref-yâfte-i sudûr olmağla leyle-i mübâreke-i mezkûrede cevâmi‘ ve mesâcid minârâtında îkād-ı kanâdil olunmak için iktizâ edenlere tenbîh eyleyesiz deyü buyruldu Fî-5 min Ra sene 1217 Ma‘rûz İşbu sâl-ı bâhirü’l-yümn ve’ş-şeref sene seb‘a aşara ve mi’eteyn ve elf gurre-i Rebî‘ülevvel hâlâ bi’r-rü’ye sâbite olmayıp gurre-i Saferi’l-hayr dahi yevmü’l-erbi‘âdan mazbûta olduğundan tekmîl-i selâsin ile gurre-i Rebî‘ülevvel yevm-i Cumadan mu‘teber olmağla mutfî-i nîrân-ı Mecûs mübtil-i âyîn-i erbâb-ı nâkûs-ı şehriyârı-nüshatgâh-ı? ıstıfâ cenâb-ı hazret-i Muhammedü’l-Mustafa aleyhi mine’s-salavât ezkâhâ ve mine’t-teslîmât agāhâ efendimizin vücûd-ı mesûd-ı âlem-su‘ûdları pertevbâş-ı etrâf-ı âlem ve matla‘-ı sa‘âdetden tulû‘-ı rûşnâyi baht-ı benî âdem olduğu şehr-i şerîf-i mezbûrun on ikinci leyle-i sülesâya tesâdüf etmekle bu ni‘met-i celîle-i uzmâya ibtihâcen ve teşekküren mübârât-ı cevâmi‘ îkād-ı kanâdil ile tezyîn ve kulûb-ı müminîn-i meserret-karîn olunmak âdet-i seniyye-i devlet-i aliyye ve deydene-i müstahsene-i seniyye olunmağın selâtîn-i izâm tağammedehüm? bi-zülâli keremihi’l-allâm hazerâtı cevâmi‘-i şerîfeleri kayyımlarına bâ-fermân-ı âlîşân tenbîh olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. El-emru hazreti veliyyü’l-emr.