İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 326 Hüküm no: 367 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kavukçu nizamı gereği Şirin v. Agob’un, Müslümanlara ait kavukçu dükkânını satın alamayacağı Kavukçu Nizâmı Ma‘rûz Âsitâne-i aliyyede vâki‘ kavukçu esnâfının Kethüdâsı İbrahim Ağa ve Mütevellî Mehmed Emin Ağa ve ihtiyâr ustalarından es-Seyyid el-Hâc Ahmed Ağa ve İsmail Ağa ve el-Hâc Ahmed Ağa ve Halil Ağa ve es-Seyyid Mustafa Ağa ve el-Hâc Ahmed Ağa ve İbrahim Ağa ve Mahmud Ağa ve Hüseyin Ağa ve Şâkir Ağa ve Ârif Ağa ve es-Seyyid Mustafa Ağa ve el-Hâc Ahmed Ağa ve Uzun Ahmed Ağa ve Tahir ve es-Seyyid Ahmed Ağa vesâirleri Çarşamba günü arz odasında huzûr-ı hazret-i kāimmakām-ı âli-makāmda ma‘kūd meclis-i şer‘-i enverde esnâf-ı mezkûrenin zimmî ustalarından Şirin v. Agob ve Kapril v. Kazros nâm zimmîler muvâcehelerinde İslâmbol’da işbu yedimizde olan bir kıt‘a fermân zikr olunan kavukçular sûkunda kâin altmış dört aded kavukçu dükkânı derûnunda mevcûde kavukçu gediği âlât-ı lâzımesi müsellem olan kavukçu ustalarına ve on üç aded kavukçu dükkânı derûnunda mevcûde kezâlik âlâtı zimmî olan kavukçu ustalarına mahsûs iken mersûm Kavukçu Şirin zimmî zikr olunan Müslime mahsûs altmış dört aded dükkândan kavukçular sûkunda vâki‘ bir bâb kavukçu dükkânında mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin mâliki olan Kavukçu İbrahim Ağa b. el-Hâc Mehmed’den dört yüz seksen guruşa iştirâ ve kabz edip lâkin âlât-ı mezkûre Müslime mahsûs olmağla suâl olunup kemâ-fi’s-sâbık Müslime bey‘ etmek üzere mersûm Şirin zimmîye ve mersûm Kapril dahi esnâfımız ustalarından olup lâkin esnâfımıza itâ‘at etmemekle esnâfımıza itâ‘at etmek üzere mersûm Kapril zimmîye tenbîh olunmak murâdımızdır dediklerinde mersûm Şirin zimmî âlât-ı muharrere-i mezkûreyi meblağ-ı mezbûr dört yüz seksen guruş arz odasında rızâsıyla esnâf-ı mezkûreden el-Hâc Ahmed Ağa’ya bey‘ ve teslîm ol dahi iştirâ ve kabz ve kabûl ve mersûm Kapril zimmî dahi fîmâ ba‘d esnâf-ı mezkûreye itâ‘at ve inkıyâd etmek üzere ba‘de’t-ta‘ahhüd du‘âhânemizde ma‘kūd meclis-i şer‘de merkūm Mehmed Emin Ağa semen-i merkūm dört yüz seksen guruşu mesfûr Şirin zimmîye def‘ ve teslîm ol dahi ba‘de’l-ahz ve’l-kabz bu vechile kat‘-ı nizâ‘ eylediklerinden esnâf-ı merkūmeden her biri fîmâ ba‘d zikr olunan altmış dört aded dükkân derûnlarında Müslime mahsûs olan gedik âlâtı ashâbının biri bey‘ murâd ettiklerinde yine Müslime bey‘ etmek üzere fermân-ı âlîleri sudûrunu istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî-selh-i S sene 1217