İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 327 Hüküm no: 368 Orijinal metin no: [52a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Topal Ahmed b. Mustafa’nın, Yağcı Kostandi v. Riko’nun aleyhine açtığı alacak davasını ispat edemediğinden muarazadan men edildiği 156 guruş Ma‘rûz Derûn-ı arzuhâlde mezkûrü’l-ism Çörekçi Topal Ahmed b. Mustafa meclis-i şer‘-i enverde arzuhâl eden Yağcı Kostandi v. Riko zimmî muvâcehesinde mersûm Kostandi zimmî târih-i i‘lâmdan altı sene mukaddem bana bey‘ ben dahi iştirâ ve kabz eylediğim ma‘lûmü’l-kıyye revgan-ı sâde semenini tamamen benden istîfâ eylediğinden mâ‘adâ sehven kendiye yüz elli altı guruş dahi ziyâde medfû‘um olmağla istirdâd ederim deyü da‘vâ ettikde ol dahi cevâbında sene-i sâbıkā Recebi’l-ferdinin altıncı günü beynimizde cereyân eden ahz u i‘tânın hesabını sahîhan lede’r-rü’ye husûs-ı mezkûra ve târih-i merkūma gelince müddet-i mezbûrede cereyân eden bi’l-cümle ahz u i‘tâya müte‘allika âmme-i da‘vâdan tarefeynden her birimiz âharın zimmetini kabûlü hâvi [52b] ibrâ ve iskāt etmişdik deyü eylediği def‘ini merkūm Topal Ahmed ikrâr u i‘tirâf ettikde sonra dönüp mersûm Kostandi zimmî bey‘ eylediği revgan-ı sâdenin vezn ve fiyatında ihânet etmediğine yemîn eylesin deyü ibrâ eylediği kelâmına iltifât olunmamağla mûcebiyle mersûm Kostandi zimmîye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-4 min Ra sene 1217