İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 327 Hüküm no: 369 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador v. Dadek’in berber dükkânına uygunsuz kişilerin gelmesi sebebiyle dükkânın kapatılması Berber dükkânından ihrâc Ma‘rûz İslâmbol’da Sancaktar Hayreddin Mahallesi İmâmı Salih Efendi ve Müezzini Mehmed Said Efendi ve ahâlîsinden Mehmed Efendi ve Yiğitbaşı Kassab Derviş Mehmed ve Süleyman Ağa ve Mehmed Ârif ve Salih Ağa ve Mustafa ve Şeyh Mustafa Efendi ve Salih Ağa ve Süleyman Çelebi ve Hâfız Mehmed Çavuş ve Mustafa Ağa ve Mehmed Ağa ve es-Seyyid Musa ve Derviş Mehmed Ağa ve Hasan Ağa’dan her biri meclis-i şer‘-i enverde zikri âtî berber dükkânı ve ittisâlinde vâki‘ arsaya bâ-temessük-ı mütevellî mutasarrıfe olan sâbıkā Hüdâvendigâr-ı âzim-i riyâz-ı cinân-ı mağfiret-nişan garîk-i lücce-i Rahmân Sultan Mustafa Hân hazretlerinin başkadınları Habîbe Kadın efendi taraflarından zikri âtî husûsta vekîlleri olan Bostanî es-Seyyid Hüseyin ile Haçador v. Dadek zimmî muvâcehelerinde mahalle-i mezbûrede vâki‘ bir bâb berber dükkânı derûnunda mevcûde gedik âlât-ı lâzımesi mersûm Haçador zimmînin mülkü olmağla mesfûr Haçador zimmî dükkân-ı mezkûrda dâimâ tarafından berberlik için mechûlü’l-ahvâl kimesneleri idhâl eylediğinden mâ‘adâ hezele makūlelerini dükkân-ı mezkûra cem‘ ve alenen şürb-ı hamr ve arak ve kumar oynatıp cümlesi sekerân olduğundan bir vechile dükkân-ı mezkûrun sûkundan sıbyân ve nisâmız mürûr ve ubûr etmediğinden mâ‘adâ bize itâle etmeleriyle bu vechile cümlemizin emn ve rahatı meslûb olmağla âlât-ı mezkûreyi mersûm Haçador zimmî esnâf-ı mezkûrenin emn ve mu‘temedine ve fîmâ ba‘d dükkân-ı mezkûr tarafına gelmemek üzere mersûm Haçador zimmîye ve müvekkile-i mûmâ-ileyhâ Habîbe Kadın efendi dahi dükkân-ı mezkûrun ittisâlinde olan arsayı dükkân-ı mezkûra bahçe ittihâz ve muhdes pencere küşâdıyla dükkân-ı mezkûrda icrâ-yı fısk ve envâ‘-ı fesâdât olunacağına bâ‘is olmağla men‘ olunmak üzere müvekkile-i mûmâ-ileyhâ Habîbe Kadın efendi’ye tenbîh olunmak murâdımızdır deyü vakf-ı mezbûrun mütevelliyesi vekîli Hâfız Tahir Efendi hâzır olduğu hâlde da‘vâ ettiklerinde mersûm Haçador zimmî dahi âlât-ı muharrere-i mezkûreyi rızâsıyla âhara bey‘ ve fîmâ ba‘d dükkân-ı mezkûra varmamak üzere ta‘ahhüd eylediğinde vekîl-i mezbûr zikr olunan arsayı berber dükkânına bahçe ittihâz ve zikr olunan berber dükkânından arsa-yı mezbûreye pencere küşâd etmeyip müceddeden sandalcı dükkânı binâ etmek üzere vekîl-i merkūm Bostanî Hüseyin ta‘ahhüd eylediğinde ahâlî-i mahalle-i merkūmûndan her biri dahi râzılar olup bu vechile kat‘-ı nizâ‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fî-3 min-Rebî‘ülevvel sene 1217