İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 328 Hüküm no: 370 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Mustafa’nın, Velotako v. Mina ve Yuvan v. Yorgi’nin birbirlerinin zimmetlerini ibrâ ettikleri Sükkerî şerbetçi ibrâsı Ma‘rûz Sükkerî şerbetçi esnâfından İsmail b. Mustafa meclis-i şer‘-i enverde bahçıvân tâifesinden Velotako v. Mina ve Yuvan v. Yorgi nâm zimmîler muvâcehelerinde târih-i i‘lâmdan bir gün mukaddem mersûmân Velotako ve Yuvan’dan varak-ı gül? iştirâ murâd eylediğimde bey‘e mümâna‘at ve beni kolluk neferâtına bi-gayr-ı hakkın ahz ve darbettirmeleriyle mersûmândan iştikâ sadedinde onlar dahi sen bizim ma‘lûmü’l-kıyye gül varağımızı bi-gayr-ı hakkın telef ve ızâ‘at etmekle tazmîn taleb ederiz deyü benden da‘vâ ol vechile beynimizde münâza‘a vâkı‘a olmuşdu el-hâletü hâzihi beynimiz ıslâh ve tevfîk olunup tarefeynden her birimiz iddi‘â eylediğimiz da‘vâlarımızda meccânen fâriğler olup zikr olunan husûslara müte‘allika âmme-i da‘vâdan tarefeynden her birimiz âharın zimmetini kabûlü hâvi ibrâ ve iskāt edip bu vechile kat‘-ı nizâ‘ eyledik deyü ikrâr ve tasdîkleri tescîl ve İslâmbol Mahkemesi’nden huzûr-ı âlîlerine i‘lâm olundu. Fî-25 min-Safer sene 1217