İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 329 Hüküm no: 371 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pirezine bt. Fona’nın, Mehmed Said b. Halil ile bedel-i sulh üzerine anlaştıkları Sandalcı iki yüz guruşa sulh Ma‘rûz Sâhibe-i arzuhâl mu‘arrefetü’ş-şahs Pirezine bt. Fona nâm Nasrâniye meclis-i şer‘-i enverde zikri âtî gedik âlâtına vaz‘-ı yedi mütehakkık olan Bezzâzistânî es-Seyyid Mehmed Said b. es-Seyyid Halil mahzarında Sandalcı Serkiz v. Bedros hâzır olduğu hâlde hâzır-ı mersûm Serkiz zimmîden iktirâz ve kabz eylediğim beş yüz guruş deynim mukābelesinde târih-i i‘lâmdan altı sene mukaddem sandal bezzâzistânında vâki‘ yedimde mülküm olan iki kanatlı dolap derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmemi bi-tarîkı’l-istiğlâl hâzır-ı mersûm Serkiz zimmîye bey‘ ve teslîm ol dahi iştirâ ve kabz ettiğinden sonra âlât-ı mezkûreyi işbu merkūm es-Seyyid Mehmed’e fuzûlî semen-i makbûz mukābelesinde bey‘ ve teslîm ol dahi iştirâ ve kabz ve ol vechile âlât-ı mezkûre yedinde olup lâkin ben ber-vech-i muharrer bey‘ini mücîze olmamamla meblağ-ı mezbûr beş yüz guruşu hâzır-ı mersûm Serkiz zimmîye edâ ile âlât-ı mezkûreden merkūm es-Seyyid Mehmed Said’in keff-i yedine tenbîh olunmak murâdımdır deyü da‘vâ eylediğimde ol dahi cevâbında sen âlât-ı muharrere-i mezkûreyi târih-i mezkûrda meblağ-ı mezbûr beş yüz guruşa bey‘-i kat‘î ile hâzır-ı mesfûra bey‘ ve teslîm ol dahi ba‘de’l-iştirâ ve’l-kabz kezâlik bey‘-i kat‘î ile semen-i ma‘lûm ve makbûza bana bey‘ ve teslîm ben dahi iştirâ ve kabz ve kabûl edip ol vechile yedimde mülk-i müşterâmdır deyip beynimizde ba‘de vukū‘ı’l-münâza‘a bâ-tavassut-ı muslihîn ben ber-vech-i muharrer tasaddî eylediğim da‘vâmdan merkūm es-Seyyid Mehmed Said ile an inkâr kat‘an li’n-nizâ‘ iki yüz guruş bedel-i makbûza ba‘de akdi’l-musâlahati ve’l-kabûl âlât-ı mezkûreye ve şürût-ı müfside ve istiğlâl ve muvâza‘a da‘vâlarına ve bedel-i sulh-i merkūm iki yüz guruşa müte‘allika âmme-i da‘vâdan ben merkūm es-Seyyid Mehmed Said ve hâzır-ı mersûm Serkiz zimmîden her birimiz âharın zimmetini ibrâ-yı âm ile ibrâ ve iskāt ve her birimiz ber-vech-i muharrer âharın ibrâsını kabûl edip bu vechile kat‘-ı nizâ‘ eyledik deyü ikrâr ve tasdîkleri İstanbul Mahkemesi’nden huzûr-ı âlîlerine i‘lâm olundu. Fî-8 min Ra sene 1217