İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 330 Hüküm no: 373 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaze bt. Yani’nin, Hristo v. Apostol aleyhine açtığı alacak davasında iddiasını ispat edemediğinden muarazadan men edildiği 500 guruş ma‘a altın mu‘ârazadan men‘ Ma‘rûz Derûn-ı arzuhâlde mezkûretü’l-ism mu‘arrefetü’ş-şahs Anaze bt. Yani nâm Nasrâniye evvelâ Çarşamba günü dîvân-ı âlide ve ba‘dehû duahânemizde ma‘kūd meclis-i şer‘-i enverde arzuhâl eden Hristo v. Apostol nâm zimmî muvâcehesinde mersûm Hristo zimmî târih-i i‘lâmdan üç ay mukaddem seni âyînimiz üzere tezvîc ederim deyü malımdan cem‘an beş yüz guruş kıymetli bir döşek ve bir minder ve bir yastık yüzü ve bir makad ve on iki çatal bıçak ve altı kaşık ve dört makreme ve bir bardak ve bir tuzluk ve bir simli hac ve üç penbezâr gömlek ve dört bez gömlek ve iki çevre ve bir yağlık ve yedi çift çorap ve dört akçe kîsesi ve bir mercan tesbîh ve bir yakut yüzük taşı ve bir fes ve bir çift nalın ile iki miskāl altın ve yirmi İstanbul altınımı ahz etmekle mevcûde ise a‘yânını ve müstehlek ise ba‘de’s-sübût kıymet-i mezkûresi olan beş yüz guruş ile iki miskāl altın ve yirmi İstanbul altınımı bi-tarîkı’z-zamân mersûm Hristo zimmîden hâlâ taleb ederim deyü da‘vâ ettikde ol dahi cevâbında müdde‘iye-i mezbûrenin ber-vech-i muharrer müdde‘âsını inkârından mâ‘adâ müdde‘iye-i mersûme Anaze Nasrâniye husûs-ı mezkûru bundan akdem benden bey‘ine da‘vâ sadedinde iken da‘vâ-yı mezkûresinden târih-i i‘lâm senesi Muharremi’l-haramının selhi günü Taratya’da? Metropolid menzilinde benimle an inkâr kat‘an li’n-nizâ‘ yüz yirmi guruş bedel-i makbûza ba‘de’s-sulh ve’l-kabûl husûs-ı mezkûra müte‘allika âmme-i da‘vâdan benim zimmetimi ibrâ ve iskāt etmişdi deyü müdde‘iye-i mersûme Anaze Nasrâniye’nin inkârına mukārin eylediği def‘ini lede’t-tezkiye makbûlü’ş-şehâde idükleri ihbâr olunan Yorgi v. Nikola ve Tanaş v. Yorgi nâm zimmîler şehâdetleriyle bi’l-muvâcehe ber-nehc-i şer‘î isbât etmeğin mûcebiyle müdde‘iye-i mezbûre da‘vâ-yı mezkûresiyle mersûme Hristo zimmîye bî-vech mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-8 Ra sene [1]217