İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 331 Hüküm no: 374 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvân Çelo Karabet v. Karakoç ve Hristo v. Dırako’nun bir daha nizama aykırı davranmayacaklarını taahhüt ettikleri Bahçıvân ta‘ahhüdü Ma‘rûz Âsitâne-i aliyye ve bilâd-ı selâsede vâki‘ bahçıvân tâifesinin kethüdâları İsmail Ağa ve Kasımpaşa bahçıvânları yiğitbaşısı Ömer Beşe ve Bahçıvân İsmail ve İbrahim ve Mustafa ve re‘âyâsından Acı Vasil ve Yorgi ve Hristo ve Metro ve Çiço ve Ziso ve Hristo ve Tarîko vesâirleri meclis-i şer‘-i enverde kasaba-i Kasımpaşa’da Bahçıvân Çelo Karabet v. Karakoç ve Hristo v. Dırako nâm zimmîler muvâcehelerinde mersûmân bahçıvân tâifesinden olup lâkin dâimâ hilâf-ı nizâmımız üzere hareket ve esnâfımızın müsin ve ihtiyâr ve kethüdâmıza itâ‘at ve inkıyâd etmeyip esnâf-ı mezkûreye te‘addî ve rencîdeden âri olmamalarıyla esnâf-ı mezkûreden hurûclarını istid‘â eylediklerinde onlar dahi fîmâ ba‘d esnâf-ı mezkûrenin kethüdâ ve müsin ve ihtiyârlarına itâ‘at ve inkıyâd ve nizâmları üzere hareket ve nizâmlarına ri‘âyet etmek üzere ta‘ahhüd ve hilâfı hareket ederler ise vaz‘-ı kürek olmalarına râzılar olduklarında esnâf-ı mezkûre dahi şikâyetlerini tehîr ve bu vechile râzılar oldukları İstanbul Mahkemesi’nden huzûr-ı âlîlerine i‘lâm olundu. Fî-8 Ra sene [1]217