İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 332 Hüküm no: 375 Orijinal metin no: [53a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Mehmed Emin b.Receb’in, Tuğcuzâde Abdülkadir Efendi’den satın aldığı cariye Zenciye Şirin’in illetli olmadığı Mecnûne Arab câriye nizâ‘ı men‘ Ma‘rûz Bâ-işâret-i aliyye sâdır olan fermân-ı âlîşâna imtisâlen sâhib-i arzuhâl Esirci Mehmed Emin b. Receb meclis-i şer‘-i enverde derûn-ı arzuhâlda mezkûrü’l-ism müderrisîn-i kirâmdan ve etibbâ-i hâssadan Tuğcuzâde Abdülkādir Efendi muvâcehesinde bin iki yüz on altı senesi Rebî‘ülâhirinde cemî‘-i uyûbdan sâlime olmak üzere işbu hâzıra bi’l-meclis Zenciye Şirin nâm câriye ile nakden yüz guruş mukābelesinde malımdan el-yevm merkūm Abdülkādir Efendi’nin yedinde olan Zenciye câriyemi merkūm Abdülkādir Efendi bi-tarîkı’l-muzâyaka benden iştirâ ve her birimiz kabz-ı semen ve bey‘ ettikden sonra ben işbu câriye-i hâzıra-i mezbûreyi gāib ani’l-meclis Sâni Salih Efendi’ye sene-i mezbûre Şa‘banında semen-i ma‘lûm ve makbûz mukābelesinde bey‘ ve teslîm ol dahi ba‘de’l-iştirâ ve’l-kabz yedinde iken merkūm Sâni Salih Efendi câriye-i mezbûre cünûn-ı mutbık ile mecnûne ve illet-i mezkûre şirâ târihinden mukaddem câriye-i mezbûrede mevcûde ve kadîm ve inde’t-tüccâr noksan-ı semen icâb [53b] eder uyûbdan olmağla redd-i mebî‘ ve istirdâd-ı semen murâdımdır deyü eylediği da‘vâsını teveccüh-i husûmet bulunduktan sonra işbu yedimde olan bir kıt‘a i‘lâm-ı şer‘î nâtık olduğu üzere şehr-i sâbık Saferi’l-hayrın yirmi birinci günü şuhûd-ı udûl ile muvâcehemde ba‘de’l-isbât ve’l-half mûcebiyle hükmolunup câriye-i mezbûre bana red olunmuşdu el-hâletü hâzihi câriye-i mezbûrede illet-i mezkûre merkūm Abdülkādir Efendi ile zikr olunan bin iki yüz on altı senesi Rebî‘ülâhirinde beynimizde olan şirâ târihinden dahi mukaddem mevcûd ve kadîm olduğuna vâkıf olmamla ben dahi redd-i semen istirdâd-ı mebî‘ murâdımdır deyü teveccüh-i husûmet bulunduktan sonra da‘vâ ettikde merkūm Abdülkādir Efendi cevâbında ben câriye-i mezbûreyi târih-i merkūmda cemî‘-i uyûbuyla semeni olmak üzere müdde‘î-i mezbûra teslîm ol dahi ber-vech-i muharrer ahz u kabz etmişdi deyü müdde‘î-i mezbûr Mehmed Emin’in inkârına mukārin eylediği def‘ini lede’t-tezkiye adl ve makbûlü’ş-şehâde idükleri ihbâr olunan Esirci Mahmud Ağa b. Abdullah ve Ahmed b. Mehmed şehâdetleriyle bi’l-muvâcehe ber-nehc-i şer‘î isbât etmeğin mûcebiyle müdde‘î-i mezbûr Mehmed Emin da‘vâ-yı mezkûresiyle merkūm Abdülkādir Efendi’ye bî-vech mu‘ârazadan men‘ olunduğu huzûr-ı âlîlerine i‘lâm olundu. Fî-27 S sene 1217