İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 333 Hüküm no: 376 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a keçi getiren celep tâifesi ile kasapların fiyatta anlaştıkları 4.500 keçi mübâya‘ası Ma‘rûz Vilâyet-i Rumeli’nde Yenişehir-i Fener kazâsından Âsitâne-i aliyyeye bin beş yüz re’s keçi sevk ve tesyîr eden celeb tâifesinden ashâb-ı arzuhâl Estayko v. Lanbo ve bin re’s keçi sevk ve tesyîr eden Maverdi v. Papa zimmî asâleten ve iki bin re’s keçi sevk ve tesyîr eden Dimo zimmînin oğlu ve tarafından husûs-ı âtîde vekîli olan Yorgi zimmî vekâleten meclis-i şer‘-i enverde hâlâ ser-kassâbân-ı hâssa Mustafa Ağa hâzır olduğu hâlde hâlâ kasablar kethüdâsı es-Seyyid Halil Ağa ve ihtiyârlarından el-Hâc Hâfız Mehmed Emin vesâir mazbûtü’l-esâmî ve ustalar mahzarlarında biz ve müvekkil-i mersûm Dimo zimmîden her birimiz mallarımız ile iştirâ ve Âsitâne-i aliyyeye sevk ve tesyîr eylediğimiz cem‘an dört bin beş yüz re’s keçinin beher kıyye tahmîni narh-ı cârisi üzere on üçer paraya ve beher kıyye iç yağını on birer paraya ve sakatını otuz bir para birer akçeye bey‘ etmek üzere mukāvele ve her birimiz ber-vech-i muharrer bey‘ u şirâya râzılar olup kassabân esnâfı mezbûrûn dahi minvâl üzere iştirâ edecekleri lahm ve iç yağı ve sakatları esmânını fiyat-ı mezkûre üzere hesaplaşıp ziyâde ve noksan teklîfi ile herbirimiz âharı rencîde etmeyip yevm-i tevzî‘den on beş gün mürûrunda yâftelerimizi ve otuz bir gün mürûrunda akçelerimizi bizlere edâ ve teslîm etmek üzere ta‘ahhüd ve ittifâk eyledik dediklerinde kassabân esnâf-ı mezbûrûn mukırrûn-ı mesfûrûnu kelimât-ı meşrûhalarında tasdîk ve tahkīk edip bu vechile beynleri ıslâh ve tevfîk olunduğu imtisâlen li-emri’l-âli huzûr-ı âlîlerine i‘lâm olundu. Fî-5 Rebî‘ülevvel sene [1]217