İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 333 Hüküm no: 377 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanko v. Nikola ile Vasil v. Toma’nın vakıf menzili davasında bedel-i sulh üzerinde anlaştıkları Vakıf menzil nizâ‘ı i‘lâmı Ma‘rûz Arzuhâl eden Tabib Yanko v. Nikola nâm zimmî meclis-i şer‘-i enverde arzuhâlde mezkûrü’l-ism Vasil v. Toma nâm zimmî muvâcehesinde nezâret-i dâ‘îlerinde âsûde evkāfdan merhûm Şeyh Sinan Erdebilî Zâviyesi mülhakātından Sinan Bey vakfının hâlâ mütevellîsi es-Seyyid eş-Şeyh Abdülgani Efendi hâzır olduğu hâlde vakf-ı mezbûr musakkafâtından Galata’da Eğrikapı dâhilinde Sultan Bâyezid Mahallesi’nde kâin ma‘lûmü’l-hudûd beher şehr otuz akçe îcâreli mersûm Vasil zimmî bâ-temessük-ı mütevellî mutatasarrıf olduğu bir bâb vakıf menzilini bin iki yüz on altı senesi Recebi’l-ferdinin gurresinde iki bin altı yüz guruş bedel mukābelesinde bana bâ-re’y-i mütevellî ferağ ve tefvîz ben dahi ber-vech-i muharrer tefevvüz ve kabûl ettikden sonra menzil-i mezkûra müte‘allika da‘vâdan dahi zimmetimi ibrâ ve iskāt etmişken mersûm Vasil zimmî el-yevm menzil-i mezkûrda mütemekkin olup bana teslîm etmemekle suâl olunup menzil-i mezkûru ba‘de’t-tahliyye bana teslîme tenbîh olunmak murâdımdır deyü da‘vâ eylediğimde ol dahi cevâbında ben menzil-i mezkûru târih-i mezbûrda sana bin beş yüz guruş deynim mukābelesinde vefâen fâriğ olmuşdum deyü ber-vech-i muharrer müdde‘âmı inkâr edip ol vechile beynimizde ba‘de’l-münâza‘a bâ-tavassut-ı muslihîn ben mersûm Vasil zimmînin menzil-i mezkûru ferağı ancak vefâen olduğunu ikrâr ve bâ-ma‘rifet-i mütevellî geri ferağa ba‘de’l-ahd bedel olmak üzere medfû‘umu iddi‘â eylediğim iki bin altı yüz guruş da‘vâmdan dahi mersûm Vasil zimmî ile kat‘an li’n-nizâ‘ iki bin guruş üzerine ba‘de’s-sulh ve’l-kabûl ziyâdesinden dahi zimmetini kabûlünü hâvi ibrâsını kabûl ettikden sonra mersûm Vasil zimmî eğer târih-i i‘lâmdan altmış bir gün mürûrunda meblağ-ı mezbûr iki bin guruşu edâ edemez ise menzil-i mezkûru bedel-i misli ve bâ-ma‘rifet-i mütevellî âhara ferağ ve bedelini kabza ve bedel-i mezkûrdan bedel-i sulh-ı merkūm iki bin guruşu takās ve mahsûbe ve bunların mütevakkıf olduğu umûrun küllîsine tarafından beni “Küllemâ azeltüke fe-ente vekîli” mazmûnu üzere azl ve in‘izalden masûne vekâlet-i devriye ile vekîl nasb ve ta‘yîn eylediğinde ben dahi vekâlet-i mezkûreyi kabûl ve merâsimini edâya ta‘ahhüd edip bu vechile kat‘-ı nizâ‘ eyledik deyü ikrâr ve tasdîkleri huzûr-ı âlîlerine i‘lâm olundu. Fî-5 Ra sene [1]217