İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 334 Hüküm no: 378 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zevi v. Antimos’un bakkal dükkânına açtığı ikinci kapıyı kapatması ve nizama uyacağını taahhüt etmesi Bakkāl dükkânı kapısı seddi Ma‘rûz Âsitâne-i aliyyede vâki‘ bakkāl esnâfının pazarbaşı vekîli Ahmed Ağa ve Yiğitbaşı es-Seyyid Ahmed ve nizâm ustalarından Aleksi ve Efnad ve İsak ve Tarafnos ve Zahraki ve Ziso ve Nikola ve Anderiko ve kabz-ı mal Luka ve İlya ve Nikola ve Acı Tano vesâirleri meclis-i şer‘-i enverde Bakkāl Zevi v. Antimos nâm zimmî muvâcehesinde mersûm Zevi zimmînin bakkāllık eylediği Samatyakapısı karşısında Kurt Ağa dükkânı demekle arîf bir bâb bakkāl dükkânının ve arasında olan kapı kadîmü’l-eyyâmdan beri bir kanatlı olup zikr olunan kapıdan dükkân-ı mezkûra bağ yükü? vesâir iktizâ eden zehâir idhâl oluna gelmişken mersûm Zavi zimmî kadîmine mugāyir zikr olunan kapısı tevsî‘ ve bir kanad dahi ihdâs ve üzerine sakf binâ edip mürûr-ı zamân ile hilâf-ı şürûtumuz müceddeden bakkāl dükkânı ihdâs edeceği zâhir olmağla ihdâs eylediği bir kanadı taş duvar ile sed ve üzerinde binâ eylediği sakfı hedm etmek üzere mersûm Zevi zimmîye tenbîh olunmak murâdımdır deyü iştikâ ettiklerinde ol dahi rızâsıyla zikr olunan kapının üzerine ihdâs eylediği sakfı hedm ve küşâd eylediği kanadı taş duvar ile sed ve kadîmi üzere bir kanadlı kapı edip hilâf-ı şürût nizâmları hareket etmemek üzere ta‘ahhüd ve hilâf-ı şürûtları hareket eder ise tedîb olmasına râzı olup bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-5 Ra sene [1]217