İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 335 Hüküm no: 379 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Hasan’ın, Kazancı İbrahim Beşe b. Halil’deki alacağından kendi rızasıyla vazgeçtiği 1.100 guruşdan meccânen ibrâ Ma‘rûz İşbu derûn-ı i‘lâmda mezkûratü’l-ism mu‘arrefetü’z-zât Ümmügülsüm bt. Hasan nâm Hatun meclis-i şer‘-i enverde hâlâ zevci kezâlik i‘lâm-ı mezkûrda mastûrü’l-isim Kazganî İbrahim Beşe b. Halil muvâcehesinde mezbûr İbrahim Beşe zimmetinde işbu derûn-ı i‘lâmda zikr ve tafsîl olunduğu üzere mahkûmun-bih alacağım olan bin yüz guruşdan meccânen fâriğa olmamla meblağ-ı mezbûr bin yüz guruşa ve işbu târih-i i‘lâma gelince sâir hukūk-ı şer‘iyyeye müte‘allika âmme-i da‘vâdan merkūm İbrahim Beşe’nin zimmetini yed ve zimmet ve kablinde aslan ve kat‘an hakkım kalmamak ma‘nâsına şürût-ı müfside ve muvâza‘adan âri cebr ve kerhden hâli ibrâ-yı âmm-ı sahîh-i şer‘î ile tav‘an ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi deyü ikrâr ve tasdîkleri tescîl ve İstanbul Mahkemesi’nden huzûr-ı âlîlerine i‘lâm olundu. Fî-12 Ra sene [1]217