İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 335 Hüküm no: 380 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Mehmed b. Hüseyin’in evinin orta penceresinden açtığı balkonu kapatması gerektiği Göbek şeh-nişîn men‘i Ma‘rûz Sâdır olan fermân-ı âlîlerine imtisâlen savb-ı şer‘-i enverden irsâl olunan Süleyman Efendi hâssa mi‘mârı hulefasından Mustafa ve es-Seyyid Hüseyin halîfeler ile İstanbul’da Musallâ kurbünde Şeyh Ferhad Mahallesi’nde Şeyh Ferhad vakfı musakkafâtından sâhib-i arzuhâl es-Seyyid Ahmed Ağa b. el-Hâc Mustafa nâm kimesnenin bi’l-îcâreteyn mutasarrıf olduğu menzile varıp huzûr-ı Müslimînde akd-i meclis-i şer‘-i âlî ettikde mezbûr es-Seyyid Ahmed Ağa meclis-i ma‘kūd-ı mezkûrda yine vakf-ı mezbûrdan menzil-i mezkûr ittisâlinde kâin bir bâb menzile ber-vech-i iştirâken bi’l-îcâreteyn mutasarrıf olan Şeyh Mehmed b. Hüseyin ile zevcesi ve zâtı ta‘rîf-i şer‘î ile mu‘arrefe olan Hatice bt. el-Hâc Ömer nâm Hatun muvâcehelerinde vakf-ı mezbûr mütevellîsi İmâm Hâfız Mehmed Efendi b. İsmail hâzır olduğu hâlde mezbûr eş-Şeyh Mehmed ile zevcesi Hatice Hatun mutasarrıf oldukları menzillerinin bir odasının orta penceresinden hilâf-ı fermân-ı âlî göbek şeh-nişîn ihdâs etmekle muhdes olan şeh-nişîni hedm olunmak matlûbumdur dedikde mezbûrân dahi cevâblarında zikr olunan göbek şeh-nişîn muhdes olduğu her biri ba‘de’l-ikrâr mi‘marân-ı mezbûrân zikr olunan göbek şeh-nişîn hilâf-ı fermân-ı âlî olduğunu ve hedmi vakfa muzır olmadığını haber verdiklerinden sonra mezbûrân eş-Şeyh Mehmed ve zevcesi Hatice Hatun zikr olunan şeh-nişîni rızâlarıyla hedm etme üzere ta‘ahhüd eyledikleni mevlânâ-yı mezbûr ma‘an mürsel ümenâ-i şer‘le meclis-i şer‘a inhâ eylediği huzûr-ı âlîlerine i‘lâm olundu. Fî-29 S sene [1]217