İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 336 Hüküm no: 381 Orijinal metin no: [54a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Laveriço’nun, Aleksi v. Zafiri ile ortağı Anaştaş v. Yorgi’ye olan borcunu ödemesi gerektiği Arabacıların kurşun semeni 2.527 guruş hüküm Ma‘rûz Arabacı tâifesinden Aleksi v. Zafiri ve şerîki Anaştaş v. Yorgi nâm zimmîler meclis-i şer‘-i enverde dülger kalfalarından Yanaki v. Laveriço nâm zimmî muvâcehesinde mersûm Yanaki zimmî işbu yedimizde olup bin iki yüz on altı senesi gurre-i Şevvâl târihiyle muvarrah bir kıt‘a mübâya‘a hücceti nâtık olduğu üzere mahrûse-i Bursa’da vâki‘ muhterik pirinçhanı arsasında toprağa karışmış mülk-i müşterâsı olan kurşunu dokuz bin vakıyyedir deyü üç bin beş yüz guruş semen-i medfû‘ ve makbûza bize bey‘ ve mahallinde kabza taslît eylediğinde biz dahi ber-vech-i muharrer ba‘de’l-iştirâ mahrûse-i mezbûrede zikr olunan kurşunu kabz murâd edip vezn ettiğimizde altı bin beş yüz vakıyye kurşun noksan idüğü zâhir oldukda biz muhayyer olduğumuza binâen mevcûd olan iki bin beş yüz vakıyye kurşunu semeninden hissesi ve kıymet-i misli olan dokuz yüz yetmiş iki guruş yirmi altı akçeye kabûl ve kabz ve istihlâk etmişdik lâkin nâkıs olan altı bin beş yüz vakıyye kurşunun semen-i merkūm üç bin beş yüz guruşdan hissesi olan iki bin beş yüz yirmi [54b] yedi guruş doksan dört akçeyi mersûm Yanaki zimmîden hâlâ istirdâd ederiz deyü da‘vâ eylediğimizde ol dahi cevâbında mahâll-i mezkûrda bir yığın kurşunu dokuz bin vakıyyedir deyü üç bin beş yüz guruşa müdde‘iyân-ı mersûmâna bey‘ini ve ber-vech-i muharrer kabza taslît eylediğini ve zikr olunan dokuz bin vakıyye kurşundan iki bin beş yüz vakıyye kurşunu âhara beyle istihlâk eylediklerini ikrâr lâkin mahâll-i mezkûrda olan kurşun dokuz bin vakıyye olup ve tamamen müdde‘iyân-ı mersûmân kabz eylediler deyü inkârlarına mukārin eylediği da‘vâsına ikāmet-i beyyine edememekle bi’t-taleb mersûmân Aleksi ve Anaştaş zimmîlere bi’l-muvâcehe ber-nehc-i şer‘î verilmeğin mûcebiyle mersûm Yanaki kalfa def‘-i mezkûruyla mersûmân Aleksi ve Anaştaş zimmîlere bilâ-beyyine mu‘ârazadan ba‘de’l-men‘ mûcebiyle semen-i merkūmdan nâkıs olan altı bin beş yüz vakıyye kurşuna iktizâ eden meblağ-ı mezbûr iki bin beş yüz yirmi yedi guruş doksan dört akçeyi müdde‘iyân-ı mersûmân Aleksi ve Anaştaş zimmîlere red ve teslîme mersûm Yanaki kalfaya tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-gurre-i Ra sene [1]217