İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 337 Hüküm no: 382 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Zakar v. Hacador’un, tütüncü gediği dükkânını Maraşlı Hasan Efendi b. Halil’e teslim etmesi gerektiği Kumrulumescid’de tütüncü gediği dükkânından ihrâc Ma‘rûz Anadolu kuzâtı eşrafından derûn-ı arzuhâlde mezkûrü’l-ism Maraşlı Hasan Efendi b. Halil Efendi tarafından husûs-ı âti’l-beyânda vekîl olduğu Zenci Ali b. Abdullah ve Molla Ahmed b. Ebûbekir şehâdetleriyle sâbit olan İsmail b. Ahmed meclis-i şer‘-i enverde arzuhâl eden Tütüncü Zakar v. Haçador nâm zimmî muvâcehesinde İstanbul’da Kumrulu Mescid Mahallesi’nde kâin müvekkil-i merkūmun bi’l-îcâreteyn taht-ı tasarrufunda olan menzilin tahtında kâin bir bâb duhâncı dükkânında mersûm Zafir zimmî müşâhereten müstecir olup lâkin dükkân-ı mezkûrun lüzumu olmağla müvekkil-i mezbûr menzil-i mezbûra idhâl murâd edip şehr-i sâbık Saferi’l-hayr gāyetinde fesh-i akd-i îcâr etmekle dükkân-ı mezbûru ba‘de’t-tahliyye kendiye teslîm etmek üzere mersûm Zakar zimmîye tenbîh olunması müvekkil-i mezbûrun murâdıdır deyü bi’l-vekâle da‘vâ ettikde ol dahi cevâbında dükkân-ı mezbûrda müvekkil-i mezbûrun müşâhereten müsteciri olduğunu ve fesh-i akd-i îcâr eylediğini ikrâr lâkin dükkân-ı mezbûrun beyne’l-esnâf mu‘teber maden kaleminde mukayyed duhâncı gediği âlât-ı lâzıme-i ma‘lûmesi yedimde mülkümdür deyip ol vechile beynlerinde ba‘de’l-münâza‘a beynleri ıslâh ve tevfîk olunup bu vechile duhâncı gediği âlât-ı lâzımesi âhar mahalle naklolunmak duhâncı esnâfının şürût-ı mer‘iyyelerinde olmağla mersûm Zakar zimmî dükkân-ı mezkûrda olan gedik âlât-ı lâzıme-i ma‘lûmesini âhar mahalle nakl ba‘de’t-tahliyye müvekkil-i merkūma teslîme ta‘ahhüd ettikde ve vekîl-i merkūm dahi fîmâ ba‘d dükkân-ı mezbûr duhâncı dükkânı etmemek üzere bi’l-vekâle ta‘ahhüd edip bu vechile külliyen kat‘-ı nizâ‘ eyledikleri huzûr-ı âlîlerine i‘lâm olundu. Fî-Ra sene [1]217