İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 338 Hüküm no: 384 Orijinal metin no: [54b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Kastandi’nin, Sultan Abdülhamid Han vakfından icareli kasap dükkânı gediğini Esterati v. Tanaş’a devrettiği Kassâb Ma‘rûz Hüdâvendigâr-ı sâbık merhûm cennet-mekân firdevs-âşiyân Sultan Abdülhamid Hân hazretleri evkāfı musakkafâtından Yedikule hâricinde kâin birinci selhhâneye merbût İstanbul’da Aksaray sebili mukābilinde vâki‘ bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin nısfına mutasarrıf olan Yani v. Kostandi nâm zimmî meclis-i şer‘-i enverde hâssa kasabbaşısı İzzetlü Mustafa Ağa tarafından vekîli kasablar kethüdâsı es-Seyyid Halil Ağa ve ustalarından mazbûtü’l-esâmî Müslimîn hâzır oldukları hâlde kasab ustalığını idâreye kādir idüğü ihbâr olunan bâ‘isü’l-i‘lâm kasab Esterati v. Tanaş nâm zimmî muvâcehesinde takrîr-i kelâm edip ber-vech-i muharrer mutasarrıf olduğum nısf-ı âlât-ı lâzıme-i ma‘lûmelerimi hüsn-i rızâmla bedel-i ma‘lûm ve makbûz mukābelesinde mersûm Esterati zimmîye bâ-re’y-i mütevellî ferağ ve tefvîz eylediğimde ol dahi ber-vech-i muharrer tefevvüz ve kabûl edip fîmâ ba‘d nısf-ı âlât-ı lâzıme-i ma‘lûmelerde benim aslan ve kat‘an alâka ve medhalim kalmayıp mersûm Esterati zimmînin hakk-ı müfevvezi olmuşdur dedikde mersûm Esterati zimmî ba‘de’t-tasdîk nısf-ı âlât-ı muharrere-i mezkûreler kendi üzerine defter-i vakfa kayd ve yedine temessük i‘tâsı istirhâm eylediği İstanbul Mahkemesi’nden huzûr-ı âlîlerine i‘lâm olundu. Fî-11 Ra sene [1]217