İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 339 Hüküm no: 385 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İsmail b. Hüseyin’in balkapanı tüccarlarına olan borcunu ödemesi gerektiği 2.300 guruş kapan-ı asel nâzırından tahlîsine i‘lâm Ma‘rûz İstanbul Balkapanı tüccârından Mehmed Emin Ağa ve Kādızâde el-Hâc Mehmed Ağa ve Salih ve Ömer ve el-Hâc Mahmud ve es-Seyyid el-Hâc Hasan ve Mehmed Yazıcı ve Ali ve Ahmed ve Kassab Mustafa ve Seyyid el-Hâc Salih ve el-Hâc Hüseyin ve Seyyid el-Hâc Mehmed ve Silistreli Hâfız Ahmed’den her biri meclis-i şer‘-i enverde kapan-ı mezbûrda nâzır olup bundan akdem zuhûr eden hıyânetine binâen bâ-fermân-ı âlî azl olunan es-Seyyid İsmail b. es-Seyyid Hüseyin mahzarında kapan-ı mezbûrdan bize fermân-ı âlî in‘âm olunan elli yedek revganı ihrâc esnâsında merkūm es-Seyyid İsmail senede altmış yedeğe izin alıverdim lâkin beher yedek için yirmişer guruş verin zira arada böyledir deyip cem‘an yüz on beş gedik kapan-ı mezbûrdan ihrâc ve bize teslîm ve beher yedeğe yirmişer guruşdan cem‘an iki bin üç yüz guruşumuzu rüşvet nâmıyla ahz etmekle hâlâ istirdâd ederiz deyü da‘vâ ettiklerinde fi’l-hakīka husûs-ı mezkûr tüccâr-ı merkūmûnun takrîrlerine mutâbık olduğu mukaddemâ sâdır olan fermân-ı âlîşâna imtisâlen lede’t-tahakkuk ke’ş-şems fî vasati’n-nehâr âşikâr olduğundan mâ‘adâ es-Seyyid İsmail istintak olundukda huzûr-ı şer‘de hâlâ gümrük emini izzetlü Hasan Ağa hâzır olduğu hâlde ikrâr u i‘tirâf etmişdi bu def‘a dahi kezâlik iki bin üç yüz guruşu tüccâr-ı merkūmûndan tamamen kabz eyledim deyü ikrâr lâkin yedimde nesne kalmamışdır demesi iltifâta şâyân olmamağla alâ-mûceb-i i‘tirâfihî meblağ-ı mezkûr iki bin üç yüz guruşu merkūm es-Seyyid İsmail’den şer‘an tahsîl ve hasımları merkūmuna teslîm ettirilmek iktizâ eylediği İslâmbol Mahkemesi’nden huzûr-ı âlîlerine i‘lâm olundu. Fî-13 Ra sene [1]217