İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 339 Hüküm no: 386 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abel ve Abros v. Kirkor’un, Ali Çavuş Ağa b. Ahmed’e olan borçlarını ödemeleri gerektiği 2.500 guruş hüküm Ma‘rûz Sâhib-i arzuhâl Mısırlı el-Hâc Ali Çavuş Ağa b. el-Hâc Ahmed meclis-i şer‘-i enverde derûn-ı arzuhâlde isimleri mezkûr Abel ve Abros veledey. Kirkor nâm karındaşların muvâcehelerinde mersûmân ile akd-i şirket eylediğimizde ben malımdan iki bin beş yüz guruş ifrâz ve târih-i i‘lâmdan on ay mukaddem mesfûrâna def‘ ve teslîm onlar dahi ma‘an kabz edip lâkin mallarından bir nesne ifrâz ve birbirine halt ve el-hâletü hâzihi akd-i şirket etmemişken mersûmân Abel ve Abros zimmîler meblağ-ı mezkûr iki bin beş yüz guruşu kendi umûrlarına sarfla istihlâk edip hatta kirâren ve mirâren iki bin beş yüz guruş bana zimmetlerinde deynleri olduğunu kat‘an ifrâz dahi etmeleriyle meblağ-ı mezbûr iki bin beş yüz guruşu hâlâ istirdâd ederim deyü da‘vâ ettikde onlar dahi cevâblarında müdde‘î-i mezbûra zimmetlerinde ancak altı yüz guruş deynleri olduğunu ikrâr mâ‘adâ müdde‘âsını inkâr etmeğin müdde‘î-i merkūm ber-vech-i muharrer ikrâr müdde‘âsını lede’t-tezkiye adl ve makbuli’ş-şehâde idükleri ihbâr olunan simkeşhâne kurbünde Emir Süleyman b. Mustafa ve Peştahtacı es-Seyyid Said b. Emin ve Sükkerî Şerbetçi Mehmed b. Said nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebiyle meblağ-ı mezkûr iki bin beş yüz guruşu müdde‘î-i merkūm el-Hâc Ali Çavuş Ağa’ya edâ ve teslîme mesfûrân Abel ve Abros zimmîlere tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-13 Ra sene [1]217