İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 341 Hüküm no: 388 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nizama aykırı hareket ettiklerinden sürgün edilen kayseri dericilerinin affedilmesi ve Kayseriye debbağları şeyhliğine Canikli Seyyid Mustafa’nın getirilmesi Sahtiyâncı esnâfının kaleden ıtlâkı ve şeyhlik i‘lâmı Ma‘rûz Sâdır olan fermân-ı âlîşâna imtisâlen işbu arzuhâle nazar olundukda Âsitâne-i aliyyede vâki‘ ibâdullâhın ayakkabı husûsunda muzâyaka çekilmemek için bundan akdem Kayseriye debbâğları Âsitâne-i aliyyeye ihzâr ve bâ-fermân-ı âlî Kayseriye sahtiyânı fiyat-ı selâseye kat‘ ve ber-mûceb-i emr-i âlî hareket etmek üzere ta‘ahhüd etmişler iken Kayseri debbâğlarından el-Hâc Mehmed ve Hâfız Mehmed ve Ahmed ve Süleyman hilâfı hareket eylediklerine binâen Rados kazâsına ve merkūmûnun şürekâları olup Âsitâne-i aliyye debbâğlarından Hüseyin ve Seyyid Mehmed ve Seyyid Halil ve Mehmed dahi merkūmûn ile ittifâk eylediklerine binâen Bozcaada kalesine bundan akdem nefy ve iclâ olundukları derkenârdan dahi müstebân oldukdan sonra Âsitâne-i aliyyede vâki‘ tâcirler kethüdâsı es-Seyyid Hüseyin Ağa ve Bahçecizâde Ahmed ve Hacı Hüseyin ve Seyyid Ahmed ve Hacı Mustafa ve Nanakoğlu Hacı Memiş ve Ahmed Odabaşı ve Gulâm Ahmed ve Na‘lbandoğlu Seyyid Ahmed ve Seyyid Hacı İbrahim meclis-i şer‘-i enverde Dikicibaşı İbrahim Ağa ve başyiğitbaşı ve diğer İbrahim ve müstecirler yiğitbaşısı Ahmed Usta hâzır olduğu hâlde her biri takrîr-i kelâm edip hâmiş-i arzuhâlde mastûr derkenâr nâtık olduğu üzere li-ecli’t-tedîb merkūmûndan her biri nefy ve iclâ olunup lâkin fîmâ ba‘d sahtiyân husûsunda bâ-fermân-ı âlî kat‘ olunan fiyat-ı selâsesi ile merkūmûn sekiz neferden her biri a‘lâyı a‘lâ ve evsatı evsat ve ednâyı ednâ yerine bey‘ edip ve hilâf-ı fermân-ı âlî hareket etmeyip ve peyderpey medîne-i Kayseriye’den Âsitâne-i aliyyeye ber-mantûk-ı emr-i âlî fiyat-ı selâse-i maktû‘a üzere sahtiyân celb edeceklerine her biri tekeffül ve ta‘ahhüd ve ıslâh-ı nefs eylediklerini dahi ihbâr ve merkūmûnun afüv ve ıtlâkları bâbında bir kıt‘a fermân-ı âlî sudûrunu ve fîmâ ba‘d medîne-i Kayseriye debbâğlarından biri bâ-fermân-ı âlî kat olunan fiyat-ı selâsenin hilâfı sahtiyân bey‘ u şirâsında hareket eder ise ancak ol kimesne tedîb olunup âhara sirâyet etmemesine ve ta‘yîn olunan mübâşire hizmet-i mübâşiriyyesini ve iktizâ eden tecrîmi ol makūle mel‘anete hasâret eden kimesneden mütâlebe edip âhardan mütâlebe ile rencîde olunmamak ve medîne-i Kayseriye debbâğları şeyhleri olan es-Seyyid Ahmed nizâm-ı mezkure adem-i ri‘âyetinden nâşî ihtilâline bâ‘is olmağla azl olunup yerine cümlemizin emin ve muhtarı olan Kayseriye debbâğlarından Canikî es-Seyyid Mustafa bâ-fermân-ı âlî şeyh nasb buyrulup ve bundan böyle şeyh olanların azl ve nasbı iktizâ eyledikde devlet-i aliyye-i ebediyyü’l-istimrâra inhâ-birle Âsitâne-i aliyye tüccârının re’y ve ma‘rifetleriyle şeyh ta‘yîn buyrulup yedlerine diğer bir kıt‘a fermân-ı âlî sudûrunu her biri istirhâm etmeleriyle merâmlarına müsâ‘ade-i aliyyeleri erzânî buyrulmak husûsu re’y-i âlîleri menût idüğü İstanbul Mahkemesi’nden huzûr-ı âlîlerine i‘lâm olundu. Fî-16 min Ra sene [1]217