İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 342 Hüküm no: 389 Orijinal metin no: [55b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi ve simitçi esnafının, francala ve has ekmek pişirip satmayacaklarını taahhüt ettikleri Çörekçi ve simitçi francala ve has ekmek tabh ve bey‘ etmemeye ta‘ahhüd i‘lâmı Âsitâne-i aliyye ve bilâd-ı selâsede vâki‘ habbâzân tâifesinin kethüdâsı Hacı Abdi Ağa ve uncular kethüdâsı es-Seyyid Mustafa Ağa ve nizâm ustalarından Topçularlı Mehmed Ağa ve re‘âyâdan Artin ve Kirkor ve Manol ve Sebron ve Ohannes ve francalacı tâifesinden Yorgi ve Mihal vesâirleri meclis-i şer‘-i şerîf-i enverde Kabasakal’da Çörekçi Ahmed b. Mahmud Atmeydanı kurbünde Çörekçi es-Seyyid Hasan b. Ahmed mahzarlarında hâlâ kapan nâibimiz müderrisîn-i kirâm-ı zevi’l-ihtiramdan Abdüllatif Efendi hâzır olduğu hâlde her biri takrîr-i kelâm ve tâ‘bir ani’l-merâm edip işbu yedimizde olan bir kıt‘a bâlâsı tuğra-yı garrâ ile mu‘anven fermân-ı âlîşân nâtık olduğu üzere çörekçi ve simitçi fırınlarında francala ve has ekmek tabh ve bey‘ olunmayıp ve hilâfı harekete bir kimesne cesâret veyâhud hufyeten francala ve has ekmek tabh eder olur ise ol kimesne ahz ve tedîb olunmaları şürût ve nizâmımızdan olup ve el-yevm düstûrü’l-amel iken mezbûrân Ahmed ve Seyyid Hasan hilâf-ı şürût çörekçi dükkânlarında francala ve has ekmek tabh ve bey‘ edip ol vechile şürût-ı nizâmımızın ihtilâline bâ‘is ve bâdi olmalarıyla men‘-birle tedîb olunmaları murâdımızdır deyü mazmûnu takrîrlerine mutâbık bir kıt‘a fermân-ı âlîşân ibrazıyla iştikâ ettiklerinde mezbûrân Ahmed ve es-Seyyid Hasan istintak olundukda cevâblarında mazmûn-ı emr-i âlîşânı ikrâr lâkin ba‘de’l-yevm dükkânlarında francala ve has ekmek tabh etmeyip ve mazmûn-ı emr-i âlî-i mezkûr üzere hareket etmek üzere ta‘ahhüd ve hilâfı hareket ederler ise kalebend olmalarıyla her biri râzılar olduklarında müdde‘ûn-ı merkūmun dahi şikâyetlerinden fâriğler olup bu vechile beynlerinde ıslâh ve tevfîk olunduğu İstanbul Mahkemesi’nden huzûr-ı âlîlerine i‘lâm olundu. Fî-12 min Ra sene [1]217