İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 342 Hüküm no: 390 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şoni bt. Yani’nin, Marko v. Yuvan aleyhine açtığı alacak davasında iddiasını ispat edemediğinden muarazadan men edildiği Mu‘ârazadan men‘ Ma‘rûz Şahsı mu‘arrefe Şoni bt. Yani nâm Nasrâniye meclis-i şer‘-i enverde habbâz tâifesinden kendi nefsinden Asıl ve şerîki Yuvan v. Terpo zimmî tarafından müseccel vekîl-i şer‘îsi olan Marko v. Yuvan muvâcehesinde İslâmbol’da Kapan-ı dakīk dâhilinde kemeraltı nâm mahalde vâki‘ altı horoslu değirmen derûnunda mevcûd beyne’l-esnâf gedik tâ‘bir olunur yirmi dört re’s bârgir vesâir âlât-ı lâzıme-i ma‘lûmeden yedimde mülküm olan iki buçuk bârgir ve ona isâbet eden âlât-ı lâzıme-i ma‘lûmemi mersûm Marko ve şerîki Yuvan zimmîlerden her birine senede yüz guruşa îcâr onlar dahi istîcâr ve kabûl etmeleriyle âlât-ı mezkûre îcâresinden şehr-i sâbık Saferi’l-hayrın gāyetine gelince iki sene müddetinde zimmetlerinde müctemi‘ olan iki guruşu ve peştamâllik nâmıyla bana beş yüz guruş dahi vermek üzere tenbîh olunmak murâdımdır deyü takrîr-i meşrûhu üzere tasaddî eylediği da‘vâlarından peştemâllik nâmıyla iddi‘â eylediği beş yüz guruş husûsunda şer‘an mersûm Marko zimmîye suâl teveccüh etmemekle iltifât olunmayıp mârrü’l-beyân îcâre-i mezkûr husûsunda merkūm Marko zimmî istintak olundukda cevâbında şehr-i sâbık Saferi’l-hayr gāyetine gelince âlât-ı mezkûrenin îcâresi olan meblağ-ı mezkûr iki yüz guruşu tamamen müdde‘iye-i mersûmeye def‘ ve teslîm etmişdik deyü eylediği def‘ini mersûm Şoni Nasrâniye inkâr etmekle dâfi‘-i asîl ve vekîl-i mersûm Marko zimmî ber-vech-i muharrer def‘-i mezkûrunu lede’t-tezkiye makbûlü’ş-şehâde idükleri ihbâr olunan habbâzân kethüdâsı el-Hâc Abdi Ağa ve uncular kethüdâsı es-Seyyid Mustafa Ağa nâm kimesne ile nizâm ustalarından Artin ve Kirkor ve Manol ve Sebron ve Ohannes zimmîler şehâdetleriyle bi’l-muvâcehe ber-nehc-i şer‘î isbât etmeğin mûcebiyle müdde‘iye-i mersûme Şoni Nasrâniye da‘vâ-yı mezkûrelerine bî-vech mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-5 min Ra sene [1]217