İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 343 Hüküm no: 391 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi b. Mustafa’nın, Receb b. Ali’den satın aldığı cariyenin illetli olmadığı Arab câriye nizâ‘ı mu‘ârazadan men‘ Ma‘rûz Sâhib-i arzuhâl el-Hâc Mustafa Efendi b. Mustafa meclis-i şer‘-i enverde derûn-ı arzuhâlde mezkûrü’l-ism Esirci Receb b. es-Seyyid Ali mahzarında mezbûr es-Seyyid Receb târih-i i‘lâmdan on üç gün mukaddem işbu hâzıra bi’l-meclis Zenciye câriyeyi cemî‘-i uyûbdan sâlime olmak üzere beş yüz yetmiş guruş semen-i medfû‘ ve makbûza bana bey‘ ve teslîm ben dahi iştirâ ve kabz etmişdim lâkin câriye-i mezbûrenin inde’t-tüccâr noksan-ı semen icâb eder ayb-ı kadîmi olmağla redd-i mebî‘ ve istirdâd-ı semen murâdımdır deyü da‘vâ ettikde câriye-i mezbûre teveccüh-i husûmet için bu makūle uyûbu teşhîse bâ-fermân-ı âlî ehl-i hibre ta‘yîn olunan huzzâk-ı etibbâdan Salih Efendi ve İbrahim Efendilere irâe olundukda onlar dahi ba‘de im‘âni’n-nazar meclis-i şer‘a gelip câriye-i mezbûrede illet olduğu ma‘lûmumuz değildir deyü haber vermeleriyle teveccüh-i husûmet bulunmadığı hûzûr-ı âlilerine i‘lâm olundu. Fî-17 min Ra sene [1]217