İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 344 Hüküm no: 392 Orijinal metin no: [56a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Ali’nin nizama aykırı davranışından dolayı, Sarrac esnaflığından çıkarıldığı Sarrac esnâfından ihrâc Ma‘rûz Âsitâne-i aliyyede vâki‘ sarrac esnâfının kethüdâsı Salih Efendi ve yiğitbaşı Molla Emin ve müsin ustalarından Hacı İbrahim ve Hacı Ahmed ve İsmail ve Salih ve Said ve Mehmed ve Ahmed ve Hacı Hasan ve Sofracı İsmail ve Ârif ve Eğerci Emin ve Numan vesâir mazbûtü’l-esâmî kimesneler meclis-i şer‘-i enverde esnâf-ı mezbûrdan Ali b. Ali mahzarında mezbûr Ali esnâfımızdan olup lâkin ırzıyla mukayyed kâr u kesbiyle meşgūl olmayıp dâimâ şürût-ı nizâmımıza muhâlif hareket ve müsin ve ihtiyârlarımıza adem-i itâ‘at-birle itâle ve bazılarımızdan da‘vâ-yı müzevvire edip bi’d-defa‘ât kendiye nush u pend olundukda kabûl etmeyip ef‘âl-i şenî‘asında ısrâr etmekle ol vechile kendiden emn ve rahatımız meslûbdur deyü her biri muvâcehesinde sû-i hâlini ihbâr ve esnâf-ı mezbûreden tard ve ihrâc olunmasını istid‘â etmeleriyle mezbûr Ali esnâf-ı mezkûreden tard ve ihrâc olunup ba‘de’l-yevm san‘at-ı mezkûreyi işlemeyip kesb-i âhara meşgūl olmak üzere tenbîhi hâvi fermân-ı âlîleri sudûru iktizâ eylediği İslâmbol Mahkemesi’nden huzûr-ı âlîlerine i‘lâm olundu. Fî-19 min Ra sene [1]217