İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 344 Hüküm no: 393 Orijinal metin no: [56a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Mustafa b. Mahmud’un vârislerinin, Hatice bt. Abdullah aleyhine açtıkları cariye semeni davasında iddialarını ispat edemediklerinden muarazadan men edildikleri Verâseten Çerkes câriye semeni mu‘ârazadan men‘ Ma‘rûz Bundan akdem vefât eden Esirci Molla Mustafa b. Mahmud’un verâseti zevce-i metrûkesi Hatice Hatun ile sulbî kebîr oğlu Mahmud ve sulbî sagīr oğlu Mustafa’ya inhisârı tahakkukundan sonra zevce-i mezbûre Hatice Hatun kendi nefsinden asâleten ve sagīr-i mezbûrun kıbel-i şer‘den mansûbe vasîsi olmağla vesâyeten ve mezbûr Mahmud dahi asâleten meclis-i şer‘-i enverde bâ‘isetü’l-i‘lâm mu‘arrefetü’z-zât Hatice bt. Abdullah nâm hatun mahzarında müteveffâ-i mezbûr hayatında mezbûre Hatice Hatun’a bey‘ ve teslîm ol dahi iştirâ ve kabz eylediği bir re’s Çerkes cinsinden ma‘lûmetü’l-evsâf câriye semeninden zimmetinde alacağı olan bin guruşu kable’l-ahz ve’l-istîfâ fevt ve meblağ-ı mezbûra mevrûs olmağla hâlâ taleb ederiz deyü ba‘de’d-da‘vâ ve’l-istintak ol dahi cevâbında ikrâr u i‘tirâf lâkin meblağ-ı mezkûr bin guruşu hayatında yedimde olan bir kıt‘a hüccet-i şer‘iyye nâtık olduğu üzere müteveffâ-i mezbûr Molla Mustafa b. Mahmud’a tamamen def‘ ve teslîm edip ol dahi kabz etmişdi deyü ba‘de’d-def‘ ve’l-inkâr dâfia-i mezbûre ber-vech-i muharrer def‘-i mezkûrunu lede’t-tezkiye makbûlü’ş-şehâde oldukları ihbâr olunan tahmîs önünde Kahveci Derviş Ali b. Abdullah [56b] ve Yusuf Ağa b. Yusuf nâm kimesne şehâdetleriyle bi’l-muvâcehe ber-nehc-i şer‘î isbât etmeğin mûcebiyle müdde‘iyân-ı mezbûrân bi’l-asâle ve bi’l-vesâye da‘vâ-yı mezkûreleriyle merkūme Hatice Hatun’a bî-vech mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-17 min Ra sene [1]217