İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 346 Hüküm no: 395 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mikail v. Avram’ın, Ebek v. Karabet aleyhine açtığı alacak davasında iddiasını ispat edemediğinden muarazadan men edildiği 2.000 guruş mu‘ârazadan men‘ Ma‘rûz Arzuhâl eden İpekçi Mikail v. Avram nâm zimmî meclis-i şer‘-i enverde derûn-ı arzuhâlde mezkûrü’l-ism Ebek v. Karabet nâm zimmî muvâcehesinde ben bin iki yüz on altı senesi Cumâdelâhire gurresinden beri malımdan iki bin guruş ifrâz ile mersûm Ebek zimmî ile ipekçilik ticâretinde inânen şerîkler iken târih-i i‘lâmdan iki ay mukaddem fesh-i akd şirket edip mersûm Ebek zimmî kabz-ı mal olmağla re’s-i malım olan iki bin guruş yedinde kalmağın hâlâ taleb ederim deyü da‘vâ ettikde ol dahi cevâbında mukaddemâ ancak şerîkler olduğunu ve ba‘dehû fesh-i akd-i şirket eylediklerini ikrâr-ı müdde‘î-i mersûmun ber-vech-i muharrer iki bin guruş re’s-i malı olduğunu inkârından mâ‘adâ mesfûr Mikail zimmî ile târih-i i‘lâmdan on gün mukaddem husûs-ı şirkete müte‘allik beynimizde câri ahz u i‘tâmızın hesabını Küçükkaraman’da iksirci dükkânında sehiv ve galatdan âri mahzar-ı şuhûdda sahîhan rü’yet eylediğimizde mesfûr Mikail zimmînin zimmetinde zuhûr eden yüz elli guruş hakkını kendiye tamamen def‘ ve teslîm ol dahi ahz u kabz edip husûs-ı şirkete ve müddet-i mezbûrede beynimizde cereyân eden cem‘î ahz u i‘tâya müte‘allika âmme-i de‘âvî ve mütâlebâtdan tarefeynden her birimiz âharın zimmetini kabûlü hâvi ibrâ ve iskāt etmişdik deyü ba‘de’d-da‘vâ ve’l-inkâr dâfi‘-i mesfûr ber-vech-i muharrer def‘-i mezkûrunu adl ve makbûlü’ş-şehâde idükleri lede’t-tezkiye zâhir olan iksirci Nişan v. Parsih ve Artin v. Abraham nâm zimmîler şehâdetleriyle bi’l-muvâcehe ber-nehc-i şer‘î isbât etmeğin mûcebiyle müdde‘î-i mesfûr Mikail zimmî da‘vâ-yı mezkûresiyle mersûm Ebek zimmîye bî-vech mu‘ârazadan men‘ olunduğu huzûr-ı âlîlerine i‘lâm olundu. Fî-19 min Ra sene [1]217