İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 346 Hüküm no: 396 Orijinal metin no: [56b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nizama uygun olarak bakkal ve küfecilerin İstanbul ve bilâd-ı selâsede sabun satmalarına müdahale edilmemesi gerektiği Sabun ticâretine dâir i‘lâm Ma‘rûz Sâdır olan fermân-ı âlîşâna imtisâlen işbu arzuhâl ve i‘lâma ba‘de’n-nazar Âsitâne-i aliyyede vâki‘ sabun tüccârı bâ-ecma‘ihim meclis-i şer‘-i enverde takrîr-i kelâm edip işbu hâmiş-i arzuhâle derkenâr olunan emr-i âlî nâtık olduğu üzere küfeci ve bakkāl ve’l-hâsıl sabun bey‘ edenler Âsitâne-i aliyyeden ve bilâd-ı selâsede bey‘ etmeğe me’zûnlar olup bir ferdin müdâhalesi iktizâ etmez iken bu esnâda kapıcılar ve dîdebânlar ve başyasakçı ve neferâtı ve tebdîl-i çukadâr kulları ol makūle küfeci ve bakkāl ve sabun bey‘ edenleri ahz ve her birine özrü bahâne ve tehdîd ve ihâfe ile tecrîm etmeleriyle ol makūle küfeci ve bakkâllar dahi bey‘ u şirâdan fâriğler ve bizim zimmetlerinde külliyetli alacağımız olan akçenin telef ve zâyi‘ olmasına ve bilâd-ı selâsede olan ibâdullâhın dahi muzâyakalarına bâdi olmalarıyla bir dirhemi diyâr-ı âhara gitmeyip bu makūle bilâd-ı selâsede bey‘ olunacak sabuna müdâhaleleri men‘ ü def‘ olunmak murâdımızdır deyü istirhâm ve fi’l-hakīka bilâd-ı selâse-i mezkûrede sabun bey‘ u şirâsına me’zûn oldukları Derkenârdan müstebân olmağla fîmâ ba‘d ol makūle sabun bey‘ eder makūleleri gerek kapıcılar ve gerek dîdebânla ve gerek başyasakçı ve neferâtı ve gerek tebdîller mürûr ve ubûrlarına müdâhele etmeyip ancak emr-i âlînin nâtık olduğu üzere bilâd-ı selâse-i mezkûrede mâ‘adâ bey‘i memnû‘ olan mahallere sabun götüren kimesneler ahz olunduklarında derhal gümrük-i kebîre habs ve tüccâr-ı merkūmûndan lede’t-tahkīk ol makūle mel‘anete cesâret eylediklerine binâen tedîb-i lâyıkası icrâ olunmasını tüccâr-ı merkūmun iltimâs ve fermân-ı âlîleri sudûrunu istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî-17 Rebî‘ülevvel sene [1]217