İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 347 Hüküm no: 397 Orijinal metin no: [56b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Kigork’ın nizama aykırı davranması sebebiyle sandalcı esnaflığından çıkarıldığı Sandalcı esnâfına dâir i‘lâm Ma‘rûz Âsitâne-i aliyyede vâki‘ sandalcı esnâfının kethüdâsı Hâfız Mehmed Emin Ağa vekîli Seyyid Salih ve yiğitbaşı es-Seyyid Mehmed Said ve müsin [ve] ihtiyârlarından el-Hâc Ahmed ve es-Seyyid İbrahim ve diğer es-Seyyid İbrahim ve es-Seyyid Hasan ve es-Seyyid İsmail ve es-Seyyid Abdülkerim ve re‘âyâ yiğitbaşısı Zaharya ve Simyon ve Lagori ve Yorgaki ve Bedros ve Kozma ve Asetati vesâirleri meclis-i şer‘-i enverde arzuhâl eden Karabet v. Kigork muvâcehesinde takrîr-i kelâm edib [57a] mersûm Karabet zimmî bundan akdem esnâfımızdan olup lâkin kendi ırzıyla mukayyed ve kâr u kesbiyle meşgūl olmayıp şürût-ı nizâmımızın hilâfı hareket-birle kalbzen dahi olmağla ol vechile nizâmımızın ihtilâline bâ‘is [ve] bâdi olduğuna binâen mukaddemâ esnâf-ı mezkûreden bâ-i‘lâm-ı şer‘î tard ve ihrâc olundukda ol dahi sandalcılığı terk ve destgâh-ı kemhacı tedârikiyle kemhacılık ederken kanâ‘at etmeyip yine sandalcı esnâfına duhûl ederim deyü iddi‘âsı hilâf-ı şürût-ı nizâmımızdan olup murâdı mahz ve ta‘cîz ve tekdîr olmağla kıbel-i şer‘den yedimize i‘tâ olunan i‘lâm-ı mezkûr tenfîz-birle mersûm Karabet zimmî te’dîp olunmak murâdımızdır deyû takrîrlerine mutâbık bir kıt‘a i‘lâm ibrâz ettiklerinde mersûm Karabet zimmî istintak olundukda mazmûn-ı i‘lâm-ı mezkûru ve kemhacı destgâhı tedârik ve sandalcılığı terk eylediğini ikrâr edip lâkin muharrer ve mukaddemâ sandalcı olduğuma binâen sandalcılık dahi ederim deyü îrad eylediği kelâmı esnâf-ı mezkûrenin takrîr ve şürût-ı nizâm-ı kadîmlerine mugāyir olduğuna binâen iltifât olunmayıp fîmâ ba‘d mersûm Karabet zimmî esnâf-ı mezkûreye karışmayıp ber-mantûk-i i‘lâm hareket edip ve eğer hilâfı hareket eder ise tedîb olunacağı tefhîm olunduğu İslâmbol Mahkemesi’nden huzûr-ı âlîlerine i‘lâm olundu. Fî-17 min Ra sene [1]217