İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 348 Hüküm no: 398 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a koyun getiren celep tâifesi ile kasapların fiyatta anlaştıkları Ganem mübâya‘ası Ma‘rûz Sâdır olan fermân-ı âlîlerine imtisâlen vilâyet-i Anadoluda Cihanbeyli aşiretinden olup Der-aliyye’ye üç yüz elli re’s ganem sevk ve tesyîr eden Emir İbrahim ve iki yüz kırk re’s ganem sevk ve tesyîr eden mikāyilli Yusuf meclis-i şer‘-i enverde ser-kassâbân-ı hâssa Mustafa Ağa hâzır olduğu hâlde hâlâ kasablar kethüdâsı es-Seyyid Halil Ağa ve ihtiyâr ustalarından el-Hâc Mehmed Emin vesâir mazbûtü’l-esâmî ustalar mahzarlarında takrîr-i kelâm edip biz mallarımız ile iştirâ ve Âsitâne-i aliyyeye sevk ve tesyîr eylediğimiz cem‘an beş yüz doksan re’s ganemin beher kıyye lahmini narh-ı cârisi üzere on üçer paraya ve beher kıyye kuyruğu yirmi ikişer paraya ve beher re’sin sakatı on beşer paraya bey‘ etmek üzere mukāvele ve ber-vech-i muharrer bey‘ u şirâya râzılar olup kassabân esnâf-ı mezbûrûn dahi minvâl-i muharrer üzere iştirâ edecekleri lahm ve kuyruk yağı ve sakatları esmânını fiyat-ı mezkûr üzere hesaplaşıp ziyâde ve noksan teklîfiyle her biri âharı rencîde etmeyip yevm-i tevzî‘den on beş gün mürûrunda yaftalarımızı otuz bir gün mürûrunda akçelerimizi bizlere edâ ve teslîm etmek üzere ta‘ahhüd ve ittifâk eyledik dediklerinde kassabân esnâf-ı mezbûrûn dahi mukırrân-ı mezbûrânı kelimât-ı meşrûhalarında tasdîk ve tahkīk edip bu vechile beynleri ıslâh ve tevfîk olduğu İslâmbol Mahkemesi’nden huzûr-ı âlîlerine i‘lâm olundu. Fî-gurre min Ra sene [1]217