İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 348 Hüküm no: 399 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Daha öncesinde tülbentçi esnaflığından çıkarılan kişilerin, durumlarının tahkik edilerek tekrar esnaf arasına dönmelerine müsaade edildiği Tülbentçi esnâfı i‘lâmı Ma‘rûz Haremeyni’ş-şerîfeyn müfettişi efendi hâzır olduğu hâlde işbu arzuhâle nazar ve keyfiyetini bî-garaz kimesnelerden lede’t-tahakkuk iktizâsını i‘lâm eyleyesin deyü bu dâ‘îlerine hitâben sâdır olan fermân-ı âlîşâna imtisâlen bi’l-ma‘iyye rü’yete memûr Haremeyni’ş-şerîfeyn müfettişi müderrisîn-i kirâm-ı zevi’l-ihtirâmdan Atâullah Efendi hâzır olduğu hâlde du‘âhânemizde akd olunan meclis-i şer‘-i enverde işbu arzuhâle ba‘de’n-nazar tülbentçi esnâfından olup ber-takrîb ile sû-i hâlleri zımnında iki kıt‘a i‘lâmla esnâf-ı mezkûrenin lonca odasından ve umûr-ı esnâfı rü’yetden men‘ olunduğu işbu arzuhâlden müstebân olunan el-Hâc Ömer Ağa ve el-Hâc Feyzullah Ağa ve el-Hâc Sâdık Ağa ve Ahmed Ağa ve el-Hâc Abdi Ağa nâm kimesneler ile Avadis ve diğer Avadis ve Mardros ve Haleblioğlu Karabet ve Uzun Kapril ve Sarıoğlu Mıgırdıç ve Mirasyedi oğlu Sahak ve Kayseriyeli Mardros nâm zimmîlerin keyfiyetleri esnâf-ı mezkûrenin hâlâ kethüdâsı Abdullah Ağa ve mu‘teber esnâfdan Hacı İbrahim Ağa ve el-Hâc Halil Ağa ve Kadri ve Ömer Ağa ve Hâfız Abdi ve Tahir Ağa ve Selim ve Derviş Mehmet Ağa ve re‘âyâsının kezâlik mu‘teberinden yiğitbaşı Ağrib ve Zador ve Magdisi ve Mikail ve Avadis ve Estefan ve Avanes ve Mikail ve Kigork ve Hanpersun ve diğer Kigork ve Kirkor ve Mikail ve Avanes ve Artin ve Karabet ve Serkiz ve diğer Karabet ve Sahak ve diğer Artin ve âhar Karabet ve Haçador ve Minas ve diğer Kirkor ve Begos ve Ohan ve Anaştaş ve Mıgırdıç ve diğer Avadis ve Oseb ve Haçador ve diğer Avanes ve Agob ve Avakim ve Karabet ve Kirhor vesâir mazbûtü’l-esâmî Müslim ve zimmî tülbentçi esnâfı ile vücûh-ı ticâretten es-Seyyid İsmail Ağa ve es-Seyyid Mehmed Ağa ve es-Seyyid Mahmud ve es-Seyyid Süleyman Ağa ve re‘âyâ tüccârının kezâlik vücûhundan Toma ve Kostandi ve Pavli ve Nikola ve Anderya ve Anton ve Nikola ve İskender vesâir mazbûtü’l-esâmî tüccâr-ı Müslim ve re‘âyâdan suâl olundukda esnâf-ı mezkûreden kendiyi bilmez müfsid ve muharrik ve mükzib ve henüz dâimâ ef‘âl ve akvâlleri her birine mugāyir olunduğuna binâen indlerimizde rağbeti olmayıp kelâmları mu‘teber olmayan kimesneler bizim ve tüccârın haber ve âgâhı yok iken hilâf-ı vâki‘ sû-i hâllerini ihbâr-birle iki kıt‘a i‘lâm ahz edip lâkin mezbûrûn Hacı Ömer Ağa ve Hacı Feyzullah ve el-Hâc Sâdık ve el-Hâc Ahmed ve el-Hâc Abdi Ağa ve mersûmûn Avadis ve diğer Avadis ve Mardros ve Haleblioğlu Karabet ve Uzun Kapril ve Sarıoğlu Mıgırdıç ve Mirasyedioğlu Sahak ve Kayseriyeli Mardros’dan her biri esnâf-ı mezkûrenin emin ve müstakīm ve dâimâ kendi ırzlarıyla mukayyed ve bey‘ u şirâlarına mu‘temed ve esnâf-ı mezkûrenin şürût-ı nizâmına vâkıf ve örf ve âdetlerine ârif olup cümlemiz ve cümle tüccâr kendilerden her vechile hoşnûd ve râzılar olup mezbûrûnun ber-vech-i muharrer ihbârları hilâf-ı vâki‘ ve gadrı mûcebdir deyü her biri merkūmûnun hüsn-i hallerini alâ-tarîkı’ş-şehâde ihbâr ve kemâkân esnâf-ı mezkûrenin lonca odasına gelip umûr-ı esnâfı bi’l-ittifâk rü’yet eylemeleri murâdımızdır deyü istirhâm etmeleriyle fîmâ ba‘d merkūmun el-Hâc Ömer Ağa ve el-Hâc Feyzullah ve el-Hâc Sâdık ve Hacı Ahmed ve el-Hâc Abdi Ağa ve mersûmûn Avadis ve diğer Avadis ve Mardros ve Haleblioğlu Karabet ve Uzun Kapril ve Sarıoğlu Mıgırdıç ve Mirasyedioğlu Sahak ve Kayseriyeli Mardros’tan [57b] her biri esnâf-ı mezkûrûnun lonca odalarına varıp umûr-ı esnâfı bi’l-ittifâk rü’yet etmelerine müdâhale olunmamak bâbında fermân-ı âlîleri sudûru iktizâ eylediği İslâmbol Mahkemesi’nden huzûr-ı âlîlerine i‘lâm olundu. Fî-15 min Ra sene [1]217