İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 350 Hüküm no: 400 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a gelen gemilerin nizamı Sefâyîn nizâmı Ma‘rûz Âsitâne-i aliyye’ye âmed-şüd eden çenber ve çekleve ve mîrî hizmeti için tutulmak lâzım geldikde tertîbe ri‘âyet olunmadığından ba‘zılarına gadr ve âhara himâye olduğundan kıllet-i sefâyîne bâ‘is olmağla fîmâ ba‘d sûret-i müstahseneye rabt olunmak bâbında beyaz üzerine sâdır olan fermân-ı âlîşâna imtisâlen hâlâ kapan-ı dakīk nâibimiz efendi ve İslâmbol ağası ve reisler kethüdâsı kulları ile husûs-ı mezkûrun sûret-i nizâmı müzâkere olundukda fîmâ ba‘d Âsitâne-i aliyyeye âmed-şüd eden sefâyînin cümlesi üç kıt‘a defter olunup bir kıt‘ası zahîre nâzırı semâhatlü efendi ve bir kıt‘a gümrük-i kebîr emini izzetlü ağa ve bir kıt‘ası kapan nâibimiz mûmâ-ileyh dâ‘îleri yedlerinde hıfz olunup lede’l-iktizâ umûr-ı mühimmeye ricâ ve şefâ‘ate ve hatır ve gönüle ve bezl-i rü’esâya rağbet ve iltifât ve bir ferde vechen mine’l-vücûh himâyet olunmamak şartıyla müretteben gümrük emîni ağa ma‘rifetiyle tutulup edâ-yı hizmet eyledikde defter-i merkūmlara şerh verilmek re’y-i savâb olduğu imtisâlen li’l-emri’l-âli İslâmbol Mahkemesi’nden huzûr-ı âlîlerine i‘lâm olundu. Fî-19 min Ra sene 1217