İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 350 Hüküm no: 401 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Moşi v. Avram’ın, dükkân ferağı ve alacak davasında Seyyid Halil b. Mustafa ile Şerife Ayşe Hatun’un zimmetlerini ibrâ ettiği Dekâkin ferağı Ma‘rûz Arzuhâl eden ipekçi Avram v. Moşi nâm Yahûdi’nin oğlu ve tarafından husûs-ı âtîde vekîl olduğu Ali Çavuş b. Hasan ve Sâdık b. İsmail şehâdetleriyle sâbit olan Moşi nâm Yahûdi meclis-i şer‘-i enverde derûn-ı arzuhâlde mezkûrü’l-ism kendi nefsinden asîl ve sulbiye-i kebîre kızı Şerîfe Âişe Hatun tarafından dahi zikri âtî husûsta tasdîka vekîli olan es-Seyyid Halil b. Mustafa mahzarında mezbûr es-Seyyid Halil Efendi bundan akdem babam ve müvekkilem mersûm Avram Yahûdi’nin mâlından bin guruş istikrâz ve kabz ettikden sonra mukābelesinde hâmiş-i arzuhâlde mezkûr derkenâr nâtık olduğu üzere merhûme Belkıs Hatun vakfı musakkafâtından kasaba-i Hasköy’de kâin ma‘lûmü’l-hudûd dört bâb dekâkînden mutasarrıf olduğu sülüs hissesini mezbûr es-Seyyid Halil Efendi ve zevcesi müteveffât Fâtıma bt. Abdurrahman nâm Hatun dahi dekâkîn-i mezkûreden mutasarrıfe olduğu sülüsân hissesini hayatında bin iki yüz iki senesi Muharrem gurresinde rızâsıyla her biri bi-tarîkı’l-vefâ bâ-re’y-i mütevellî fâriğler olup müvekkilim babam mesfûr dahi ba‘de’t-tefevvüz mezbûre Fâtıma Hatun hisse-i mezkûresini kable’t-tahlîs fevt ve hasbe’l-âde kızı müvekkile-i mezbûre Şerîfe Âişe Hatun’a intikāl etmişdi lâkin babam müvekkil-i mersûm ile merkūm es-Seyyid Halil Efendi’nin beynlerinde ahz u i‘tâları olmağla bu esnâda rü’yet eylediklerinde babam müvekkil-i mersûm meblağ-ı mezkûr bin guruşun sekiz yüz altmış guruşunu merkūm es-Seyyid Halil Efendi’den istîfâ etmiş olmağla bâkīsi olan yüz kırk guruşu dahi merkūm es-Seyyid Halil Efendi babam müvekkil-i mersûma def‘ ve teslîm eylediğinde ol dahi zikr olunan dört bâb dekâkînden sülüs hissesini mezbûr es-Seyyid Halil Efendi’ye ve sülüsân hissesini dahi kızı müvekkile-i mezbûre Şerîfe Âişe Hatun’a bâ-re’y-i mütevellî ferağ ve tefevvüz eylediğinde onlar dahi ba‘de’t-tefevvüz zikr olunan dekâkîn-i mezkûrelere ve meblağ-ı mezkûr bin guruşa müte‘allika âmme-i da‘vâdan tarefeynden her biri âharın zimmetini kabûlü hâvi ibrâ ve iskāt eylediler deyü mukırr-ı vekîl-i mersûmun ikrârını mezbûr es-Seyyid Halil Efendi tasdîk eylediği İslâmbol Mahkemesi’nden huzûr-ı âlîlerine i‘lâm olundu. Fî-18 min Ra sene 1217