İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 351 Hüküm no: 402 Orijinal metin no: [57b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Artin’in, kalpakçı esnafındaki alacak davasından kendi rızasıyla vazgeçtiği Ma‘rûz Derûn-ı arzuhâlde mezkûrü’l-ism Karabet v. Artin bi’t-terâzi meclis-i şer‘-i enverde Âsitâne-i aliyyede vâki‘ kalpakçı esnâfının kethüdâları vekîli esnâf-ı mezkûrenin çavuşları Mustafa Ağa hâzır oldukları hâlde kalpakçı esnâfından Kazeros ve Simyon ve Bağdisar ve Andon ve Mesael ve Karabet ve Takfur ve Ohannes ve Ahannes ve Artin ve Kirkor ve Ağya ve Mikail nâm on üç nefer zimmîler muvâcehelerinde mersûmûn bundan akdem bâ-fermân-ı âlî on üç aded kalpakçı dükkânı küşâd eylediklerinde ben vaz‘-ı kürek olunmamla bi-şartü’r-rücû‘ emirleriyle malımdan kürekden tahlîsim için ve mahâll-i âharlara verdiğim cem‘an bin üç yüz guruşu mersûmûndan bi’l-mürâca‘a hâlâ taleb ederim deyü da‘vâya tasaddî etmişdim el-hâletü hâzihi ben tasaddî eylediğim da‘vâ-yı mezkûremden meccânen fâriğ olup mersûmûn vesâir kalpakçı esnâfı ile aslan ve kat‘an da‘vâ ve nizâ‘ım olmamağla zikr olunan husûslara ve işbu târih-i i‘lâma gelince ma‘lûm ve mechûl sâir hukūk-ı şer‘iyyeye müte‘allika âmme-i de‘âvî ve mütâlebât ve kâffe-i eymân ve muhâsamâtdan mersûmûn ile sâir bi’l-cümle kalpakçı esnâfının zimmetlerini ibrâ-yı âmm-ı sahîh-i şer‘î ile kabûllerini hâvi ibrâ ve iskāt edip eğer ba‘de zamân kalpakçı esnâfının birinden da‘vâ-yı mezbûreye tasaddî eder isem vaz‘-ı kürek ile tedîb olunmağa râzı oldum deyü ikrâr u i‘tirâfını mesfûrûndan her biri tasdîk eyledikleri İslâmbol Mahkemesi’nden huzûr-ı âlîlerine i‘lâm olundu. Fî-21 min Ra sene 1217