İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 352 Hüküm no: 404 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi b. İshak’ın bostancı tâifesinden olması ve nizama aykırı davranması sebebiyle kasaplıktan men edildiği Kassab men‘i Ma‘rûz Ashâb-ı arzuhâl Âsitâne-i aliyyede vâki‘ kasab esnâfının kethüdâsı es-Seyyid Halil Ağa ve nizâm ustalarından es-Seyyid Mehmed ve es-Seyyid Abdülkādir ve el-Hâc Halil ve el-Hâc Mehmed ve el-Hâc Osman vesâirleri meclis-i şer‘-i enverde Karaağaç ocağı bostancılarından Abdi b. İshak muvâcehesinde mezbûr Abdi bostanî tâifesinden olup kasablıkda kat‘an alâkası olmadığından mâ‘adâ kasab gedikleri merhûm cennet-mekân firdevs-âşiyân Sultan Abdülhamid Hân hazretlerinin vakfından olup müceddeden kasab dükkânı küşâdı ve bir mahalde n âhar mahalle nakli memnû‘ iken mezbûr Abdi bu esnâda hilâf-ı şürût gâh müceddeden kasab dükkânı küşâdı ve gâh âhar mahalde n gedik nakli ile esnâf-ı mezkûrenin ihtilâline bâ‘is olmağla men‘ ü def‘ olunmak murâdımızdır dediklerinde mezbûr Abdi istintak olundukda cevâbında esnâf-ı mezkûrenin takrîrlerini bi-tamâmihî tasdîk ve kendinin kasablıkda alâkası olmadığını ikrâr lâkin babam kasab olmağla ben dahi müceddeden kasab dükkânı ihdasıyla kasablık ederim deyü îrad eylediği kelâmı esnâf-ı mezkûrenin takrîrlerine mugāyir ve şürûtlarına muhâlefet olmağla iltifât olunmayıp fîmâ ba‘d bu makūle hilâf-ı şürût hareket etmeyip eğer hilâf-ı nizâm mezkûr hareket eder ise te’dîp olunacağı kendiye tefhîm olunduğu huzûr-ı âlîlerine i‘lâm olundu. Fî-23 min Ra sene 1217