İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 353 Hüküm no: 405 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki arasta haffaf esnafı ve dikici esnafının anlaşarak kati niza eyledikleri Haffâf esnâfına dâir Ma‘rûz İstanbul’da Sultan Mehmed kurbünde vâki‘ arasta haffâflarının kethüdâsı es-Seyyid Ali Ağa ve Hâfız el-Hâc Mustafa ve el-Hâc Feyzullah ve Mehmed Efendi vesâirleri meclis-i şer‘-i enverde Dikicibaşı İbrahim Ağa ve başyiğitbaşı İbrahim ve ustalarından Ahmed ve es-Seyyid Mehmed ve Kılıç Alemdâr vesâirleri mahzarlarında kadîmü’l-eyyâmdan beri zikr olunan arasta haffâflar kethüdâsı olan arasta-i mezkûrenin haffâflarını ve dikici ve tâcirin iktizâ eden nizâm-ı intizâmına dâir husûslarını ve kalfa ve çırak vesâir mevâdlarını rü’yet edegelmişken bu esnâda Dikicibaşı İbrahim Ağa tarafından dört nefer kimesneyi zikr olunan arastaya köşe ustası ta‘yîn ve her biri âharın re’yine muhâlif ve ol vechile umûrlarımız tatil ve bize gadr olmağla men‘-birle kadîmden olageldiği vech üzere rü’yet olunması murâdımızdır dediklerinde dikicibaşı-yı merkūm cevâbında haffâflar kethüdâsı haffâf esnâfının ve dikicibaşı dikici esnâfının umûr ve husûslarını yedimde olan birkaç kıt‘a i‘lâm nâtık olduğu üzere rü’yet eylemesi şürût-ı nizâm-ı kadîmimizdendir deyip ol vechile beynlerinde ba‘de’l-münâza‘a beynleri ıslâh ve tevfîk olunup fîmâ ba‘d mezbûr dikicibaşı dört nefer kimesneleri ref‘ ve yerlerine tarafından bir yiğitbaşı nasb ve ta‘yîn ol dahi haffâflar kethüdâsı merkūm ile ittifâk-ı haffâf ve ancak arasta-i mezkûrede olan dikici ve tâcir esnâflarının umûr ve husûslarını rü’yet ve şâkird ahz eylediklerinde ve bir şâkird ve pîr-perver olup san‘atında mâhir oldukda ancak mezbûrânın ma‘rifetiyle düstûr verilip ve kalfa usta oldukda dikici başı olanlara ifâde ve onun re’y ve ma‘rifetiyle usta çıkmak üzere her biri ittifâk ve ahd-i misak edip bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-15 min Ra sene [1]217