İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 354 Hüküm no: 406 Orijinal metin no: [58a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esma bt. Ali’nin, evinin Halil Beşe b. Mustafa’nın menziline bakan tarafına açtığı pencereyi ve saçağı kaldırması gerektiği Keşif i‘lâmı Ma‘rûz Sâdır olan fermân-ı âlîlerine imtisâlen savb-ı şer‘-i enverden irsâl olunan Süleyman Efendi nezâret-i Hazret-i Şeyhülislâm-ı sellemehü’l-İslâmî’de âsûde evkāf müfettişi müderrisîn-i kirâm-ı zevi’l-ihtirâmdan Halebli Adem Efendi tarafından mürsel Abdullah Efendi hâssa mi‘mârı hulefâsından Mehmed Emin ve Ahmed Halîfeler ile nezâret-i hazret-i müşârun-ileyhde âsûde evkāfdan Sunullah Efendi vakfından Çinilihamam kurbünde Sekbanbaşı İbrahim Ağa Mahallesi’nde vâki‘ sâhib-i arzuhâl Halil Beşe b. Mustafa ve zevcesi Hatice bt. Osman nâm Hatunun ber-vech-i iştirâk bi’l-îcâreteyn mutasarrıf oldukları menzile varıp huzûr-ı Müslimînde akd-i meclis-i şer‘-i âlî ettiklerinde mezbûr Halil ile zevcesi zâtı mu‘arrefe Hatice Hatun’dan her biri meclis-i ma‘kūd-ı mezkûrda menzil-i mezkûr ittisâlinde kâin Ferhad Ağa vakfı musakkafâtından bir bâb menzile bi’l-îcâreteyn mutasarrıfe olan Esma bt. Ali nâm hatunun vâlidesi ve tarafından ber-vech-i âtî vekîl olduğu zât-ı mezbûreyi ârifân Musa Ağa b. İsmail ve Osman Ağa b. Ali şehâdetleriyle [58b] sâbit olan mu‘arrefetü’z-zât Âişe bt. Hasan nâm Hatun ile terâfu‘larında müvekkile-i mezbûre Esma Hatun mutasarrıfe olduğu menzilinin arsa-yı hâliyesi üzerine ulyâda ve vustâda iki bâb oda ihdâs ve damlalığı yok iken bizim arsamız üzerine saçak itâle eylediğinden mâ‘adâ muhdes pencerelerinden dahi menzilimizin makarr-ı nisvân olan mahallerine nezâreti olup ol vechile zarar-ı mübeyyeni olmağla ba‘de’l-keşf ve’l-mu‘âyene zarar-ı mübeyyeni men‘ ü def‘ olunmak matlûbumuzdur deyü mârrü’l-beyân Sunullah Efendi vakfının mütevelliyesi tarafından mürsel câbî-i vakf Mustafa Efendi ve sâlifü’l-beyân Ferhad Ağa vakfının mütevellîsi hâzır oldukları hâlde da‘vâ eylediklerinde mi‘marân-ı mezbûrân vesâir mazbûtü’l-esâmî Müslimîn ile keşf ve mu‘âyene olundukda müvekkile-i mezbûre Esma Hatun’un binâ eylediği menzilin tabaka-i ulyâsından üç aded pencerelerinden müdde‘iyân-ı mezbûrânın menzillerinin makarr-ı nisvân olan mahallerine nezâreti olduğu zâhir oldukdan sonra vekîl-i mezbûra istintak olundukda ber-vech-i muharrer nezâreti olan pencerelerin muhdes olduğunu ve müdde‘iyân-ı mezbûrânın arsalarına saçak itâle eylediğini bi’l-vekâle ikrâr ve mi‘marân-ı mezbûrân mesâhalarıyla ihdâs eylediği ebniyenin tûlen dört zirâ‘ on beş parmak ve arzan iki buçuk zirâ‘ mahallini kat‘ ve itâle eylediği saçağı ref‘-birle zarar-ı şer‘îsini def‘a bi’l-vekâle ta‘ahhüd eyledikde müdde‘iyân-ı mezbûrân dahi râzılar olup bu vechile kat‘-ı nizâ‘ eylediklerini Mevlânâ-yı mezbûrân ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ eyledikleri tescîl ve huzûr-ı âlîlerine i‘lâm olundu. Fî-21 min Ra sene [1]217